ҚОШ КЕЛДІҢ, ӘЗ НАУРЫЗ!

Қасиетті рамазан айымен қатар келген Әз-Наурызды көпшілікпен бірге тойлау, ізгі жандардың бірін-бірі құрметтеп ауызашар дастарханына шақыру, әдеби-сазды кештер өткізу сияқты рухани бас қосулар Қазақ ұлттық аграрлық зерттеу университетінің факультеттері арасында жалғасуда.

Осы дәстүр аясында «Инженерлік-техникалық» факультеті «Энергия үнемдеу және автоматика» кафедрасының 1 курс докторанттары Сымбат Чарибаева мен Майгүл Бақытованың ұйымдастыруымен «Қош келдің, Әз Наурыз!» атты мерекелік іс шара өткізілді.

«Бұл кештің мақсаты – халқымыздың ежелгі салт-дәстүрін, әдет-ғұрыпын студент жастарға үйрете отырып, Ұлыстың ұлы күні – Наурыз мерекесінің орны ерекше екенін түсіндіру және тарихымызды, өткенімізді білуге, құрметтеуге, жалпы адамдарға деген сүйіспеншілкті арттыруға шақыру», - дейді факультет деканы Ләззат Әлдібаева.

Мерекелік кешке университеттің профессор-оқытушылар құрамы мен студенттер белсене қатысып, өздерінің ән-жырымен, әсем билерімен топ алдына шығып, қол күресі, әзіл жарыстыру сияқты өнерлерін ортаға салды.

Сондай-ақ, Құрманғазы атындағы Қазақ ұлттық консерваториясының өнерпаз жастары арнайы құттықтай келіп, домбыра мен жетіген сияқты ұлттық аспаптардан құйқылжыта күй төкті, әуелете ән салды.

Наурыз мейрам жүректерге нұр сепкен,

Маңдайымнан сүйіп жатыр күн көктем.

Жарығыңмен, шуағыңмен Күн - Ана,

Алып келдің жер бетіне гүл көктем! – деген жыр жолдарын арнады.

Баршаңызға Әз Наурыз құт-берекесі мен жақсылығын ала келсін!

KazNARU Баспасөз қызметі