ҚазҰАЗУ

KAZNARU СТУДЕНТІ «TURKI FEST ALMATY – 2025» ФЕСТИВАЛІНДЕ ӨЗ ӨНЕРІМЕН ЖАРҚЫРАДЫ

Алматы қаласында әл-Фараби атындағы Қазақ ұлттық университетінің, Алматы қаласы әкімдігінің және Жастар саясаты басқармасының қолдауымен «Turki Fest Almaty – 2025» қалалық жастар фестивалі өтті. Аталмыш шараға қаладағы 10-ға жуық жоғары оқу орнынан жиналған 300-ден астам дарынды жас қатысып, өз өнерлерін ортаға салды.

Фестивальдің іріктеу кезеңінде өнерпаздар түрлі жанрларда бақ сынап, ең үздіктері гала-концертке жолдама алды. Солардың қатарында Қазақ ұлттық аграрлық зерттеу университетінің «Орман шаруашылығы және жер ресурстары» факультетінің 2-курс студенті Жасұлан Тасболат та бар. Ол «Вокал» номинациясы бойынша оза шауып, қазылар алқасының жоғары бағасына ие болды.

Жас талант фестивальде дипломмен марапатталып, 50 мың теңге көлеміндегі жүлдені иеленді. Гала-концерттің шымылдығы да Жасұланның орындауындағы «Атамекен» әнімен жабылды.

Бұл жеңіс – жас өнерпаздың еңбегі мен талантының айғағы ғана емес, сонымен қатар KazNARU студенттерінің біліммен қатар шығармашылық салада да биік белестерді бағындырып жүргенінің дәлелі.

Өнерлі студентіміз Жасұланға шығармашылық шабыт тілеп, тағы да жеңісімен құттықтаймыз! Алға, KazNARU жастары!