KazNARU ПРОФЕССОР-ОҚЫТУШЫЛАР ҚҰРАМЫ АУҚЫМДЫ КӘСІБИ БАҒДАР ЖҰМЫСТАРЫН ЖҮРГІЗУДІ ЖАЛҒАСТЫРУДА

Қазақ ұлттық аграрлық зерттеу университеті профессорлық-оқытушылар құрамы мектептер мен колледждерде ауқымды кәсіби бағдар беру жұмыстарын жүргізуді жалғастыруда.

Атап айтқанда, «Топырақтану, агрохимия және экология» кафедрасының оқытушылары Муташева Г.С. және Букенова Э.А. №4 Пушкин атындағы гимназия базасында оқушылармен кездесу өткізіп, мамандық таңдаудың маңыздылығы туралы түсіндіру жұмыстарын жүргізді.

Сонымен қатар, «Тағам өнімдерінің технологиясы және қауіпсіздігі» кафедрасының қауымдастырылған профессоры Т.К. Боранбаева Шымкент қаласының білім беру ұйымдарында кәсіби бағдар беру жұмыстарын ұйымдастырды. Кездесулер барысында А. Аскаров атындағы №77 мектеп-лицейінде 144, №87 мектепте 103, №137 мектепте 176 және Тамақтану индустриясы және сервис колледжінде 26 бітірушімен кездесулер өткізіліп, нәтижесінде жүздеген оқушы қамтылды.

«Инженерлік технологиялар» факультеті де бұл бағыттағы жұмыстарды белсенді түрде жалғастыруда. И.В. Сахаров атындағы «Көлік техникасы және технологиялары» кафедрасының оқытушылары Дәулетбек Д.Д. мен Исмайлова Ш.Б. әл-Фараби атындағы бейіндік мектеп базасында 47 оқушымен кездесу өткізіп, олардың болашақ мамандық таңдауына бағыт-бағдар берді.

Сондай-ақ «Энергетика және электротехника» кафедрасының аға оқытушылары Алматы электромеханикалық колледжінде болып, бітіруші түлектермен кездесіп, техникалық мамандықтардың артықшылықтарын түсіндірді.

«Н.О. Базанова атындағы жануарлар биологиясы» кафедрасының профессоры Қайруллаев К.Қ. №65 мектеп-гимназия оқушыларымен кездесу өткізіп, 11-сыныптың 117 түлегіне кәсіби бағдар берді. Кездесу барысында оқушыларға ақпараттық материалдар таратылып, QR-код арқылы сауалнама жүргізілді.

Кәсіби бағдар беру барысында оқушыларға университеттің білім беру бағдарламалары, оқуға түсу талаптары, академиялық ұтқырлық мүмкіндіктері, сондай-ақ болашақтағы кәсіби даму бағыттары туралы жан-жақты ақпарат берілді.

Жалпы алғанда, Қазақ ұлттық аграрлық зерттеу университеті профессорлық-оқытушылар құрамы кәсіби бағдар беру жұмыстарын жүйелі түрде жалғастырып келеді. Бұл іс-шаралардың басты мақсаты – мектеп бітіруші түлектерге дұрыс мамандық таңдауға көмектесу, олардың қызығушылықтарын анықтау және еліміздің аграрлық саласына білікті мамандар даярлауға үлес қосу болып табылады.

KazNARU Баспасөз қызметі