KazNARU ТЕХНОЛОГТАРЫНЫҢ КӘСІБИ ҚҰЗЫРЕТТЕРІН ҚАЛЫПТАСТЫРУДАҒЫ ПРАКТИКАЛЫҚ ДАЙЫНДЫҚТЫҢ РӨЛІ

✳️ KazNARU университетіндегі практикалық дайындық – мамандардың кәсіби құзыреттерін қалыптастырудағы негізгі тетік болып табылады. Ол теориялық білімді нақты өндірістік дағдыларға айналдырып, болашақ технологтардың кәсіби қалыптасуына ықпал етеді.

✳️ Заманауи технологтың практикалық дайындығы өндіріс жағдайын терең меңгеруді, көпкомпонентті тағам өнімдерінің рецептуралық құрамдарын жобалау мен құрастыруды, технологиялық жабдықтармен жұмыс істеуді, өндірістік желілерді басқаруды, сыни және креативті ойлауды дамытуды, сондай-ақ еңбек жағдайына бейімделуді қамтамасыз етеді.

✳️ Осыған орай, 6В07207 – «Тағам өнімдерінің технологиясы» білім беру бағдарламасының 2-курс студенттері 2026 жылғы 23 наурыз бен 24 сәуір аралығында KazNARU ғылыми-білім беру технологиялық платформасы жанындағы аккредиттелген ғылыми-білім беру инновациялық орталықта өндірістік практикадан өтті.

✳️ Өндірістік практика барысында студенттер орталық зертханаларының құрылымы мен қызметімен, өлшеу құралдарымен, сынақ және технологиялық жабдықтармен танысты. Сонымен қатар, сүт және сүт өнімдері, ұн, нан және нан-тоқаш өнімдерінің органолептикалық және физика-химиялық көрсеткіштерін зерттеудің заманауи стандартты әдістерін меңгерді.

✳️ Тағам өнеркәсібіндегі стандарттарды меңгеру және қатаң сақтау – сапалы әрі қауіпсіз өнім өндірудің кепілі. Осыған байланысты студенттерге азық-түлік шикізаты мен дайын өнімдерге қойылатын ұлттық және мемлекетаралық стандарттармен, олардың сапасы мен қауіпсіздігіне, таңбалануына қойылатын талаптармен, сондай-ақ өнімдердің сәйкестігін растау рәсімдерімен (декларациялар мен сертификаттар алу) танысу мүмкіндігі берілді.

✳️ Орталықтың оқу-өндірістік базасында студенттер бидай ұнының физика-химиялық көрсеткіштерін ультрадыбыстық анализаторда және кептіру шкафында анықтау, сүттің сапасын титриметриялық және ареометриялық әдістермен бағалау, ет өнімдерінің қауіпсіздік көрсеткіштерін микропроцессорлы рН-метр мен портативті трихинеллоскоп арқылы зерттеу дағдыларын игерді. Сонымен қатар, нан-тоқаш, ұннан жасалған кондитерлік өнімдер, ет және сүт өнімдерін өндірудің заманауи технологиялық кезеңдерімен танысты.

✳️ Практика барысында әрбір студент заманауи технологиялық жабдықтарда өсімдік және жануар тектес өнімдерді өндіру процестерінің режимдері мен параметрлерін әзірлеу және жетілдіру бойынша жеке тапсырмаларды орындап, дайын өнімдерді апробациялау мүмкіндігіне ие болды.

✳️ Сонымен қатар, студенттер республикалық «Таза Қазақстан» экологиялық акциясы аясында ұйымдастырылған сенбілікке қатысып, университеттің ғылыми-білім беру технологиялық платформасы аумағын тазалау жұмыстарына атсалысты. Бұл олардың экологиялық мәдениетін қалыптастыруға және қоршаған ортаға деген жауапкершілігін арттыруға ықпал етті.

✳️ Қорытындылай келе, ағымдағы оқу жылында технолог мамандардың практикалық дайындығы олардың кәсіби әлеуетін ашуда маңызды рөл атқарды. Ол теориялық білімді нақты дағдылар мен құзыреттерге айналдырып, студенттердің болашақ кәсіби ортаға бейімделуіне, кәсіби ойлауын дамытуына және өндірістік тәжірибе жинақтауына мүмкіндік берді.