Зияткерлік сайыс: Латын тілі бойынша викторина қорытындысы!

23 сәуір күні 118-дәрісханада (10-оқу ғимараты) латын тілінен қызықты викторина өтті. Студенттер дресс-кодқа сай дәстүрлі ақ халаттары мен медициналық қалпақтарын киіп, көтеріңкі көңіл-күймен өз білімдерін ортаға салды!

Ойын екі тартысты кезеңнен тұрды. Бірінші кезеңде командалар 5 блок бойынша әртүрлі қиындықтағы сұрақтарға (100-ден 500 ұпайға дейін) жауап берді. Ал екінші кезеңде бәсекелестік қыза түсті — дұрыс жауаптар үшін ұпайлар екі есеге артты! Қатысушылар 30 секунд ішінде жауап беретін күрделі тапсырмаларды орындап, жауап беру құқығын қарсыластарына беріп отырды, сондай-ақ көңіл-күйді көтеретін әзіл сұрақтарға да жауап берді. "Барлығына арналған" арнайы сұрақтар санатында жанкүйерлер де ойынға атсалысты.

Бұл зияткерлік сайыста келесі топтардың командалары бақ сынасты: вет-25-15, вет-25-16 және вет-25-18.

Қатысушылардың білімін бағалап, ережелердің сақталуын қадағалаған және ғылыми бәсекелестік рухын қолдаған құрметті оқытушыларымыз:

Джанабекова Гүлмира Күмісқалиқызы
Жылқышыбаева Меруерт Мәлікқызы
Ерназарова Сандуғаш Төкенқызы
Өтебаев Жасұлан Маратұлы
Қамбарбеков Амалбек Тайшықұлы

Сайыс соңына дейін тартысты болды! Викторина қорытындысы бойынша жүлделі орындар келесідей бөлінді:

🏆 1-орын — Вет-25-18 тобы 🥈 2-орын — Вет-25-15 тобы 🥉 3-орын — Вет-25-16 тобы

Жеңімпаздарды құттықтаймыз және барлық қатысушыларға жарқын, әділ ойын мен латын терминологиясын тамаша меңгергендері үшін алғыс білдіреміз! Шақыру қағазымызда жазылғандай: "Non scholae, sed vitae discimus" (Біз мектеп үшін емес, өмір үшін оқимыз).

Келесі зияткерлік кездесулерде жүздескенше!