2027 ЖЫЛҒА АРНАЛҒАН ЖАС ҒАЛЫМДАРДЫ ГРАНТТЫҚ ҚАРЖЫЛАНДЫРУ КОНКУРСЫ ЖАРИЯЛАНДЫ

Қазақстан Республикасы Ғылым және жоғары білім министрлігінің Ғылым комитеті 2027 жылға арналған ғылыми және (немесе) ғылыми-техникалық жобалар бойынша жас ғалымдарды гранттық қаржыландыру конкурсын жариялады. Конкурс жас ғалымдардың ғылыми-зерттеу бастамаларын қолдауға бағытталған. Жобаларды іске асыру мерзімі – 36 ай.

Ғылымды дамытудың басым бағыттары:

1. Климаттық орнықтылық, су қауіпсіздігі, табиғи ресурстар, АӨК-нің тұрақты дамуы;
2. Технологиялық егемендік және өнеркәсіптік бәсекеге қабілеттілік;
3. Денсаулық, адами даму және өмір сүру сапасы;
4. Ұлттық қауіпсіздік, қорғаныс және аумақтар мен өмірлік маңызды инфрақұрылымның орнықтылығы;
5. Іргелі зерттеулер, ғылыми қор және ғылыми әлеует.

Ғылыми жетекшілерге қойылатын негізгі талаптар:

1. Резиденттік мәртебесі: Қазақстан Республикасының резиденті болуы тиіс.
2. Жасы: өтінім берген сәтте жетекшінің және зерттеу тобының жасы 44 жастан аспауы тиіс (44 жас қоса алғанда).
3. Ғылыми дәрежесі: философия докторы (PhD), бейіні бойынша доктор, ғылым кандидаты немесе ғылым докторы дәрежесінің болуы міндетті. Ғылыми-зерттеу немесе ғылыми-педагогикалық тәжірибесі жоба бағытына сәйкес келуі қажет.
4. Ғылыми жарияланымдары: 2022–2026 жылдар аралығында ұсынылатын жоба бағыты бойынша конкурстық құжаттамадағы талаптарға сәйкес ғылыми жарияланымдарының болуы тиіс.

Қатысу шарттары мен біліктілік талаптары конкурстық құжаттамада толық көрсетілген.

Өтінімдерді қабылдау мерзімі: 2026 жылғы 13 қазаннан 11 қарашаға дейін (қоса алғанда).

Конкурстық өтінімдер «Ұлттық мемлекеттік ғылыми-техникалық сараптама орталығы» АҚ ақпараттық жүйесі арқылы электрондық түрде беріледі және белгіленген тәртіппен электрондық цифрлық қолтаңбамен (ЭЦҚ) расталады.