РЕСПУБЛИКА РУХЫ: ҚҰҚЫҚТЫҚ САНА ЖӘНЕ ҰЛТТЫҚ МҮДДЕ

2026 жылғы 22 қазан күні Қазақ Ұлттық Аграрлық Зерттеу Университетінің Әлеуметтік-гуманитарлық пәндер кафедрасында 25 қазан – Республика күніне орай «Республика рухы: құқықтық сана және ұлттық мүдде» тақырыбында танымдық-зияткерлік ойын болып өтті.

Іс-шараны кафедра меңгерушісі Е.Б. Оспанов және саясаттану пәнінің оқытушылары М.Ш. Назарова мен З.И. Ашимова ұйымдастырды. Білім сайысына «Биотехнология» мамандығының 1-курс студенттерінен құралған БТ 26-07К тобы қатысты.

Іс-шараның басты мақсаты – жастардың бойында отансүйгіштік қасиеттерді қалыптастыру, 1990 жылғы Мемлекеттік егемендік туралы декларацияның тарихи маңызын ұғындыру және жаңа буынның саяси-құқықтық сауаттылығын арттыру.

Зияткерлік ойын жалаң теориялық сұрақ-жауап форматында емес, студенттердің логикалық ойлауын, шапшаңдығын және командалық ауызбіршілігін сынайтын заманауи интерактивті кезеңдермен ерекшеленді:

• «Зияткерлік матрица» кезеңінде студенттер егемендік тарихы, 2026 жылы күшіне енген жаңа Конституция баптары және мемлекеттік рәміздер бойынша түрлі деңгейдегі сұрақтарға жауап берді.

• «Саяси цитата» турында Алаш арыстары мен ел қайраткерлерінің ұлттық мүдде мен рух туралы айтқан қанатты сөздерінің авторларын анықтады.

• «Тарихи тізбек» және «Құпия сандық» сияқты логикалық тапсырмалар арқылы қатысушылар Тәуелсіздік жолындағы тарихи оқиғаларды хронологиялық ретпен тізіп, жасырын құқықтық терминдерді тапқырлықпен шеше білді.

Ойын барысында БТ 26-07К тобының студенттері 4 командаға бөлініп, жоғары белсенділік пен саяси эрудиция көрсетті. Дәстүрлі дәріс форматынан тыс өткен бұл шара білім алушылардың саясаттану пәніне деген қызығушылығын арттырып, ұлттық құндылықтарға деген жауапкершілігін оятты.

Сайыс қорытындысы бойынша ең жоғары ұпай жинаған жеңімпаз топтар мен белсенді қатысушылар ұйымдастырушылар тарапынан арнайы академиялық ұпайлармен және ынталандыру сыйлықтарымен марапатталды. Ел ертеңі саналатын жастардың мемлекеттік мүдде мен құқықтық сананы терең түсінуі – Әділетті Қазақстанның жарқын болашағының кепілі.