«KazNARU МЕНІҢ УНИВЕРСИТЕТІМ – МЕНІҢ МАҚТАНЫШЫМ» ДЕЙДІ СТУДЕНТТЕР
Қазақ ұлттық аграрлық зерттеу университетінің профессор-оқытушылар құрамы жер-жердегі колледждерде, өздері бітірген орта мектептерде кәсіби бағдар беру жұмыстарын жүйелі жүргізіп келе жатқанын бұдан бұрын да бірнеше рет жазғанбыз.
Сонымен қатар, университетіміздің білім алушылары да қысқы каникул кезінде өздерінің туған жерлеріндегі білім алған мектептерге барып, жоғары сынып оқушыларымен кездесіп, KazNARU туралы ақпараттар беріп, кәсіби бағдар жұмысына өз үлестерін қосуда.
Атап айтқанда, «Тағам өнімдерінің технологиясы және қауіпсіздігі» кафедрасының студенті Әсемай Жамгырбай Түркістан облысы, Түлкібас ауданы Т.Әубәкіров атындағы орта мектепке барып, есте қаларлықтай қызықты кездесу ұйымдастырды.
Сондай-ақ, белсенді студенттеріміз – Аян Оңғарбай Жамбыл облысының Шу қаласындағы Ахмет Байтұрсынұлы атындағы гимназияның, Динара Ғаппарова Алматы облысы Қаскелен қаласындағы «Kursant» жекеменшік мектебінде, Анеля Еркинбай Жамбыл облысы Қордай ауданы Қордай ауылындағы орта мектепте, Жібек Атамұрат Түркістан облысы, Мақтаарал ауданы, Мырзакент кентіндегі С.Рахымов атындағы № 4 орта мектепте, Шұғыла Әбсаттар Қызылорда облысы, Жанақорған ауданы Түгіскен ауылы №4 Балжан Бөлтірікова атындағы мектеп-лицейде болып, жоғары сынып оқушылары арасында арнайы сауалнама өткізді.
Бұл жақсы дәстүрді алыстағы Маңғыстау, Атырау, Ақтөбе т.б. облыстарда да жалғастырып жүрген студенттеріміз аз емес.
«Біздің мақсатымыз – өзіміздің 95 жылдық тарихы бар қара шаңырағымыз KazNARU-дың абыройын асқақтата отырып, білім алушылардың қатарын толықтыруға үлес қосу. Біздер елімізде ғана емес, Орта Азияда аграрлық салада үздіктер қатарын бастап келе жатқан өз университетімізді мақтан тұтамыз. Және мектеп бітіруші түлектерді осында жоғары білім алуға шақырамыз», - дейді активист Динара Ғаппарова.
Активист студенттер жас өрендермен кездесу өткізуге қолдау көрсеткен барлық мектеп директорлары мен университетімізде үздік оқып, үлгі көрсетіп жүрген білім алушылардың ата-аналарына Ректордың Алғыс хатын тапсырып, берік байланысты одан ары нығайтудағы белсенділіктері үшін басшылықтың сәлемін жеткізді.
Кәсіби бағдар беру жұмыстарына белсенді қатысып жүрген барша ұстаздар қауымы мен студенттерге сәттілік тілейміз!
KazNARU Баспасөз қызметі
