«Жастар ысырапшылдыққа қарсы» челленджі өтті

Факультетімізде жастар арасында үнемшілдік мәдениетін қалыптастыру және қоғамдағы ысырапшылдықтың алдын алу мақсатында «Жастар ысырапшылдыққа қарсы» атты челлендж ұйымдастырылып өтті. Аталған челленджге факультет студенттері белсенді түрде қатысып, өздерінің азаматтық ұстанымдарын танытты.

Іс-шараның басты мақсаты – жастарға ысырапшылдықтың зиянын түсіндіру, табиғи ресурстарды ұқыпты пайдалануға шақыру және саналы тұтыну мәдениетін қалыптастыру болды. Қазіргі таңда тағам, су, электр энергиясы және уақыт секілді маңызды құндылықтарды орынсыз пайдалану қоғамдағы өзекті мәселелердің біріне айналып отыр. Осыған байланысты челлендж барысында студенттер үнемшілдікке, жауапкершілікке және қарапайымдылыққа үндейтін түрлі бастамалар көтерді.

Челлендж аясында білім алушылар арнайы бейнероликтер дайындап, әлеуметтік желілер арқылы көпшілікке үндеу жасады. Сонымен қатар, ысырапшылдықтың қоршаған ортаға, экономикаға және адам тәрбиесіне тигізетін кері әсері жөнінде пікір алмасып, өз ойларын ортаға салды. Студенттер күнделікті өмірде артық шығынды азайту, тағамды қадірлеу, су мен электр қуатын үнемдеу, уақытты тиімді пайдалану жөнінде нақты ұсыныстар айтты.

Іс-шара жастардың әлеуметтік белсенділігін арттырып қана қоймай, ұлттық құндылықтарды дәріптеуге де бағытталды. Қазақ халқының «Ысырап — ырысқа жау» деген нақыл сөзі негізінде қатысушылар үнемшілдік пен қанағатшылдықтың маңыздылығын насихаттады.

Факультет студенттерінің белсенділігі мен ұйымшылдығы челлендждің жоғары деңгейде өтуіне ықпал етіп, көпшілікке жақсы үлгі көрсете білді. Осындай тәрбиелік мәні зор шаралар алдағы уақытта да өз жалғасын табатын болады.