KazNARU СТУДЕНТТЕРІ МАЛАЙЗИЯНЫҢ ПАХАНГ УНИВЕРСИТЕТІНІҢ ДИПЛОМЫН АЛДЫ
Жоғары оқу орындары арасындағы студенттер алмасуы 2022 жылғы KazNARU мен Паханг университеттерінің (UMPSA) «Биотехнология» БББ бойынша бірлесе қабылдаған екі дипломдық бағдарлама негізінде жүзеге асырыла бастады.
Өткен жылы Қазақ ұлттық аграрлық зерттеу университетіндегі «Зооинженерия және тағам өндірісінің технологиясы» факультетінің «Тағам өнімдерінің технологиясы және қауіпсіздігі» кафедрасында білім алушы 4-ші курс студенттері Жания Серікова мен Данил Акшимбаев Малайзияның Куантан қаласында орналасқан Аль-Сұлтан Абдулла Паханг университетіне бір жылдық оқуға аттанған болатын.
Паханг университеті (UMPSA) Малайзиядағы 19 мемлекеттік университеттердің тізіміне кіретін инженерлік, технологиялық бағдарламалар мен зерттеулердің жетекші провайдері болып табылады. Университеттің Пекан, Гамбанг аталатын екі кампусы және 7 факультеті бар.
Онда механикалық инженерия, жер ресурстары, химиялық және табиғи ресурстар инженериясы, өнеркәсіптік ғылымдар мен технологиялар, компьютерлік жүйелер және технологиялық менеджмент сияқты бағыттарда оқытады.
Елдегі халықтың қарқынды өсуі (32 млн. адам) азық-түлік өнімдерін тұтынуды ұлғайту мақсатында жаңаша ғылыми зерттеулер мен техникалық прогресті дамытуды талап етеді.
Міне, аграрлық секторға қажетті ең заманауи инновациялық технологияларды меңгерген осы екі студентіміз «Өнеркәсіптік ғылымдар мен технологиялар» факультетін үздік аяқтап, 2024 жылдың 5 маусымында ағылшын тілінде дипломдарын сәтті қорғады.
Жания Серікованың жетекшісі – dr. Muhammad Adam Lee Bin Abdullah, аға оқытушы, клеткалық және молекулярлы биология ғылымының кандидаты.
Данил Акшимбаевтың жетекшісі – dr. Noor Diana Binti Abdul Majid, аға оқытушы, химия ғылымдарының кандидаты.
Оқу ордамыздың абыройын асқақтатып, Паханг университетін үздік бітірген студенттерімізді жемісті қадамдарымен құттықтаймыз!
KazNARU Баспасөз қызметі
