KazNARU-да СТУДЕНТТЕРДІҢ ПСИХОЛОГИЯЛЫҚ САУАТТЫЛЫҒЫН АРТТЫРУҒА АРНАЛҒАН ВОРКШОП ӨТТІ
15 қазанда Қазақ ұлттық аграрлық зерттеу университетінде (KazNARU) «Harmony» психологиялық қолдау қызметінің ұйымдастыруымен «Студенттердің мазасыздығы: себептері, алдын алу және өзіндік көмек тәсілдері» тақырыбында воркшоп өтті. Іс-шара студенттердің психологиялық сауаттылығын арттыруға және күнделікті өмірде қолдануға болатын пайдалы дағдыларды дамытуға бағытталды.
Кездесу барысында қатысушылар мазасыздықтың пайда болу себептерін, оның адамның ойлауына, эмоциялық күйіне, дене реакцияларына және күнделікті әрекетіне әсерін талқылады. Сондай-ақ ішкі жай-күйіндегі өзгерістерді дер кезінде байқап, оларға саналы түрде әрекет ету жолдарымен танысты.
Воркшоптың тәжірибелік бөлімінде студенттер өздерін алаңдататын жағдайларды талдап, ойларын саралау, эмоциялық тепе-теңдікті сақтау және зейінді қазіргі сәтке шоғырландыру әдістерін үйренді. Ерекше назар адамның өз бақылауындағы мәселелерді ажырата білуіне және қиын сәттерде өзіне көмектесу тәсілдерін қолдануына аударылды.
Іс-шара соңында қатысушылар алған әсерлерімен бөлісіп, үйренген әдістерін күнделікті өмірде пайдалану мүмкіндіктерін талқылады.
Мұндай кездесулер студенттердің өзін-өзі тануына, психологиялық саулығына саналы түрде қарауына және қажет жағдайда дер кезінде көмек сұрау мәдениетін қалыптастыруға ықпал етеді.
.jpeg)
