KazNARU КОЛЛЕДЖ БІТІРУШІ ТҮЛЕКТЕРІНЕ «АШЫҚ ЕСІК» КҮНІН ӨТКІЗДІ
Қазақ ұлттық аграрлық зерттеу университетінде Алматы технологиялық-қаржы және инновациялық-техникалық колледжінің түлектері үшін АШЫҚ ЕСІК күні ұйымдастырылды.
Негізгі мақсат – Колледж бітірушілердің кәсіби бағдарлануын қолдау; Жоғары білім беру ордасының материалдық-техникалық базасымен таныстыру; Болашақ мамандықты дұрыс таңдауға ықпал ету; Колледж және Университет арасындағы ынтымақтастықты одан ары нығайту.
Колледждің арнайы пәндер оқытушысы Асылзат Мұратханқызының жетекшілігімен келген АТҚжИТ "Стандарттау, метрология және сертификаттау" мамандығы бойынша 3-курс бітірушілері KazNARU базасындағы оқу корпустарымен, зертханаларымен және материалдық-техникалық базасымен танысып, оқытушылар тарапынан білім беру бағдарламары туралы ақпараттар алды.
Халықаралық талаптарға сай оқу сапасына қол жеткізуді, цифрлы университет құруды, нағыз ғылыми зерттеу оқу орнына айналуды мақсат етіп отырған KazNARU QS халықаралық рейтингісі бойынша Орта Азияда 6-шы, Қазақстанда үздік ТОП-5 ЖОО қатарында көрініп келеді.
Жас түлектер университеттің оқу ғимараттарына барып, аграрлық мамандықтың болашағы, жұмыс нарығындағы сұранысы және карьералық өсу перспективалары туралы маңызды әңгімелер тыңдады. Өздерін толғандырған барлық сұрақтарға мамандардан тиісті жауаптар алды.
«Студенттеріміз университеттің білім беру бағыттарының ерекшеліктері мен ғылыми-зерттеу бойынша инновациялық жұмыстармен танысып, қазіргі заманғы зертхана жабдықтарын өз көздерімен көріп, қызығушылық танытты. Осындай мазмұнды іс-шара ұйымдастырған университет басшылығына өз ризашылығымызды білдіреміз» дейді Асылзат Мұратханқызы.
KazNARU Баспасөз қызметі
