ҚазҰАЗУ БАСШЫЛЫҒЫ АУҒАНСТАН ИСЛАМ ӘМІРЛІГІНІҢ БАС КОНСУЛДЫҒЫ ӨКІЛІМЕН КЕЗДЕСТІ

2023 жылы 13 қарашада Қазақ ұлттық аграрлық зерттеу университеті Басқарма Төрағасы-Ректорының м.а. Пірімқұл Ибрагимов Ауғанстан Ислам Әмірлігінің Алматы қаласындағы Бас Консулдығының өкілі Амири Ахмед Фавадпен кездесті.

Кездесуге Басқарма Төрағасы-Ректордың орынбасары Айнұр Қайырбаева, Халықаралық қатынастар мен стратегиялық даму проректоры Рафис Абазов, факультет декандары және Халықаралық офистің жетекшісі мен менеджерлері қатысты.

Өз сөзінде ҚазҰАЗУ Басқарма Төрағасы-Ректорының м.а. Пірімқұл Ибрагимов Ауған елімен арада университетіміздің ынтымақтастық қарым-қатынасы даму үстінде екенін және осында білім алып жатқан ауғандық студент жастар қатары жыл сайын өсіп келе жатқанын атап өтті.

Бүгінгі таңда «Ветеринария», «Агробиология», «Инженерлік-техникалық», «Су, жер және орман ресурстары» факультеттері мен «Бизнес және жоғары құқық мектебінде» 81 ауған азаматы оқып, білім алуда. Оның ішінде: 16 магистр, 35 бакалавриат, 30-ы дайындық курсында оқиды.

Кездесуде студенттердің оқу үлгерімдері мен білім сапасы, әлеуметтік-тұрмыстық мәселелері, білім алушылардың университеттің ішкі кағидаларын орындау талаптары, міндеттері, жатақханалардағы тұру ережелері, шетелдік азаматтардың ҚР-на келіп-кетуі, тіркелуі сияқты ережелерді орындау мәселелері сөз болды.

Тараптар болашақта өзара қарым-қатынасты одан ары дамытып, Ауған студенттеріне білім беру аясын кеңейту бағытындағы жұмыстарды екі ел арасындағы келісімге сәйкес бірлесе жүргізуге уағдаласты.

Шара соңында Ауғанстандық дипломат Амири Ахмед Фавад өздерін толғандырған сұрақтарға қанағаттанарлық жауап қайтарғаны және жылы қабылдағаны үшін университет басшылығына алғысын білдірді.

ҚазҰАЗУ баспасөз қызметі