KazNARU ӨКІЛДЕРІ «ALMATY GARDEN SHOW» ХАЛЫҚАРАЛЫҚ ФЕСТИВАЛІНЕ БЕЛСЕНЕ ҚАТЫСУДА

2024 жылғы 13 қыркүйекте Алматының орталық саябағында Қазақстандағы бау-бақша өнерінің, ландшафтық дизайнның және қоршаған ортаны абаттандырудың жалғыз халықаралық Almaty Garden Show фестивалі басталды. Фестиваль биыл Қала күнін мерекелеуге байланысты он екінші рет орайластырылып отыр.

Almaty Garden Show фестивалінің басты мақсаты – өркениет пен экологияның маңызды элементі саналатын қоршаған ортаны жасылдандыру миссиясына жұртшылықтың назарын аудару, еліміздегі ландшафттық дизайннің өзіндік ерекшеліктері бар екенін, жалпы әлемдік заманауи үрдістер аясында дамып келе жатқанын қоғамға таныту.

Белгілі бау-бақша дизайнерлері мен өсімдік питомниктерінің сәулетшілері бас қосқан іс-шараға Қазақ ұлттық аграрлық зерттеу университетінің оқытушылары мен студенттері – «Орман шаруашылығы және жер ресурстары» факультетінің деканы Д.Н.Сарсекова, қауымдастырылған профессор Ф.А.Тоқтасынова, KazNARU жанындағы «Sky Garden» қытай компаниясымен бірлесіп жаңадан құрылған «Қазақстан-Қытай ландшафттық инновациялар орталығының» директоры Цзян Бинью және аудармашы, PhD Н.Б.Сапарбаева қатысты.

Іс-шара аясында фестиваль қатысушылары ландшафт және бау-бақша өнері саласындағы заманауи трендтермен және жетістіктермен танысуға мүмкіндікке ие болды. Жасыл жәрмеңкенің шатырларында гүлді сәндік өсімдіктер, шағын абаттандыру алаңдары ұсынылды. Сондай-ақ, шақырылған сарапшылар мен жетекші мамандар студенттерге интерактивті демонстрациялар мен шеберлік сабақтарын өткізді.

Ландшафтық дизайн және көгалдандыру саласындағы көптеген танымал кәсіпорындардың басшылары біздің студенттерге жұмыс орындарын ұсынды және білікті ландшафтық дизайнерлерді дайындау бойынша өзара ынтымақтастыққа дайын екендіктерін жеткізді.

KazNARU баспасөз қызметі