KazNARU БІЛІМГЕРІ «ТҮРКІ ХАЛЫҚТАРЫНЫҢ ҮЗДІК СТУДЕНТІ» ХАЛЫҚАРАЛЫҚ БАЙҚАУЫНДА ЖЕҢІМПАЗ АТАНДЫ
Қазақ ұлттық аграрлық зерттеу университетінің білімді студенті Халықаралық байқауда топ жарды. Бизнес және құқық жоғары мектебі факультеті, Х.Д. Чурин атындағы «Менеджмент және агробизнесті ұйымдастыру» кафедрасында білім алатын Байдулла Байдаулет «Түркі халықтарының үздік студенті» конкурсында 1-ші дәрежелі дипломмен марапатталып отыр.
Байқауды «Bilim orkenieti» ұлттық инновациялық ғылыми-зерттеу орталығы «Жаңа Қазақстан» республикалық инновациялық орталығымен бірлесіп ұйымдастырған. Шараға еліміздің ғана емес, бірнеше мемлекеттің үздік студенттері қатысты.
Мұндай ауқымды байқауда алдыңғы топтан көріну KazNARU абыройын асқақтатқаны сөзсіз.
Байдулла Байдаулет Мұратұлы Түркістан облысы, Қазығұрт ауданы Қазығұрт елді мекенінің тумасы. Орта білімді 2021 жылы аяқтасымен арман қуып Алматыдағы агросаладағы қара шаңырақ KazNARU-ға грантқа оқуға түседі.
Жастайынан талапты, жігерлі болып өскен ол университет қабырғасында белсенді студенттердің де қатарынан көріне білді. Дәстүрлі түрде өтетін ең ауқымды әрі танымал жобалар «Үздік студент», «Үздік балмұздақ» «Жас Көшбасшы» және тағы да басқа шараларда бақ сынады, білімін көрсетті.
2022 жылдан бастап «ЭжБЖМ» «Жас Отан ЖҚ» ұйымының төрағасы атанды. Университетте білім ала жүріп, елімізде өткізілген республикалық форумдардан, жарыстардан қалмайтын. Тіпті Қазақстан Республикасының кезектен тыс Президент сайлауында, Парламент сайлауында, сонымен қатар АЭС салу бойынша өткен Республикалық Референдумда белсенді жұмыстар атқарды.
Заң ғылымдарының кандидаты, профессор, «Бизнес және құқық жоғары мектебі» факультетінің деканы Ажинурина Динара Ажинуровна және Х.Д. Чурин атындағы «Менеджмент және агробизнесті ұйымдастыру» кафедрасының аға оқытушысы, кураторы Куралбаева Роза Есенгалиевнаның қолдауымен Байдулла Байдаулет осы оқу жылдары арасында «ТМД Үздік Студенті-2023» халықаралық байқауының лауреаты, Қазақстан Республикасы үздік студенттерінің бірі марапаттарына ие болды.
Әрине, бұл қоғамдық істермен қатар басқару жүйесінде өз мамандығымен бағын сынап жүрген Байдаулет үшін үлкен жетістік. Десе де білімді жастың болашағы әлі алда. Биік белестерді бағындыратынына сенім мол.
Осы орайда Байдулла Байдаулетті лайықты марапатымен құттықтаймыз!
KazNARU Баспасөз қызметі
