KazNARU СТУДЕНТТЕРІНЕ ЛОГИСТИКА САЛАСЫНЫҢ ҚЫР-СЫРЫН ТЕРЕҢ ТҮСІНДІРГЕН ТАҒЛЫМЫ МОЛ ДӘРІС ОҚЫЛДЫ
2024 жылдың 5 қарашасында Қазақ ұлттық аграрлық университетінің Инженерлік технологиялар факультеті И.В.Сахаров атындағы көлік техникасы және технологиялары кафедрасында қонақ дәрісі оқылды. Студенттерге «Габаритті емес жүктер» тақырыбын қамтыған мазмұнды мағлұматты «Trans Expeditions» компаниясы бас директорының орынбасары Робертс Элвис Радеш түсіндірді.
Дәріске көлік, көліктік техникасы және технологиялары, көлікті пайдалану және жүк қозғалысы мен тасымалдауды ұйымдастыру және логистика (сала бойынша) білім беру бағдарламаларының студенттері мен профессор-оқытушылар құрамы қатысты.
Робертс Элвис жобалық логистикада 20 жылдық тәжірбиесі бар, көліктік қызмет көрсету, тасымалдау саласында тәжірибелі маман. Ол 16 жыл бүкіләлемдік банкте жобалар бойынша кеңесші, 10 жыл Орталық Азия және Кавказда FedEx аймақтық директоры қызметін атқарған.
Дәріс өте тартымды өтті. Арнайы қонақ Робертс Элвис өзінің ұзақ жылдар бойғы компаниядағы жұмысы туралы қызықты, тартымды ақпараттарымен бөлісті. Әрі қазір тасымалдау және көліктік қызмет саласындағы мамандар қандай болуы керек, қандай тілдерді меңгергені абзал және неге көңіл аударулары керек деген мәселелерді тыңғылықты түсіндірді.
Жобалық логистика – бұл логистиканың мамандандырылған түрі. Жобалаумен, тасымалдауды басқарумен және үлкен жобаларды іске асыруға арналған тауарларды сақтаумен айналысады. Ал, габаритті емес жүктер дегеніміз – ол стандартты өлшем немесе салмақтан артық тауарлар болғандықтан оны тасымалдау өте күрделі болады. Ондай жүктерге тасымалдаудың ерекше жағдайын қажет ететін ірі машиналар, құрылыс жабдықтары, модульдар және басқа заттар жатады.
Бүгінде Қазақстанда логистика және тасымалдау мамандығына сұраныс өте жоғары. Бұл мамандықтың болашағы зор. Робертс Элвис оны нақты мысалдармен, презентацияларымен көрсетіп, студенттердің бұл мамандықөа деген қызығушылығын арттыра түсті.
Тағлымды дәріске қатысқандар өздерінің көкейлерінде жүрген сауалдарына салмақты жауап ала білді. Сонымен қатар, компанияда практикадан өту және болашақта жұмысқа тұру үшін қандай талаптар қойылатынын сұрап білді.
Кафедра меңгерушісі М.Жетпейсов Робертс Элвистің студенттерге арнайы келіп оқыған қонақ дәрісіне алғысын айтып, ары қарай осы компаниямен тығыз байланыста жұмыс істесек деген тілегін білдірді.
KazNARU Баспасөз қызметі
