KazNARU НАРЫҚ СҰРАНЫСЫНА САЙ БІЛІКТІ МАМАНДАРДЫ ҚЫТАЙДЫҢ ШИХЭЦЗЫ УНИВЕРСИТЕТІМЕН БІРЛЕСЕ ДАЙЫНДАЙДЫ

Бүгін 2024 жылдың 13 қарашасында Қазақ ұлттық аграрлық зерттеу университетінде ҚХР Шихэцзы университетінің өкілдерімен ынтымақтастық кездесу ұйымдастырылды. Құрметті қонақтармен университеттің Басқарма мүшесі, Басқарма Төрағасы-Ректордың Бірінші орынбасары Пірімқұл Шолпанқұлұлы келіссөз жүргізді.

Шихэцзы университеті өкілдерін жоғары оқу орнынан кейінгі директордың орынбасары Ван Чжунке бастап келді. Тараптар оқу ордасының мүмкіндігі мен білім бағдарламалары туралы ақпаратпен алмасып, алдағы уақытта бірлесе жұмыс істеу, білікті, нарық сұранысына сай маман даярлау жоспарларын талқыға салды.

Университеттің Басқарма мүшесі, Басқарма Төрағасы-Ректордың Бірінші орынбасары Пірімқұл Шолпанқұлұлы құрметті қонақтарға еліміздегі жетекші оқу ордаларының бірі KazNARU тынысымен таныстырды.

«Қазақстанда 95 жылдық тарихы бар, аграрлық ғылымдардың көш басшы университетіне қош келдіңіздер! Бүгінгі таңда Шихэцзы университеті KazNARU-дың ҚХР-дағы ең маңызды ынтымақтастық серіктесі есептеледі. Қазіргі кезде университетімізде 161 PhD докторант, 215 магистрант, 5753 студент, 130 білім беру бағдарламалары бойынша білім алады. «Ветеринария» бағыты бойынша білім алушы студенттер 300 кредитті меңгереді, ал қалған білім беру бағдарламалары 240 кредитті құрайды. Магистратура білім беру бағдарламалары 120 кредитті, PhD докторантура 180 кредиттен тұрады. Университетіміз әлемнің 170-тен астам жетекші университеттерімен, ғылыми-зерттеу орталықтарымен ынтымақтастық орнатқан. ҚХР жоғарғы оқу орындары ең маңызды серіктес ел болып табылады. Баршаңызға мәлім, университетіміздің ҚХР-да 40 тан астам серіктес мекеме ұжымдары бар», - деді Пірімқұл Шолпанқұлұлы.

Қазақ ұлттық аграрлық зерттеу университеті – әлемдік QS рейтингінде 301-350 орында, «Ауыл шаруашылығы және орман ресурстары» бағыты бойынша әлемнің үздік 350 университетінің қатарында. Сонымен қатар, Азия рейтингінде QS Орталық Азия университеттері арасында 6-орын, Қазақстанда 5-орында тұрған республикадағы жетекші зерттеу университеті.

Ал, Шихэцзы Университеті Қытайдың Шыңжаң-Ұйғыр Автономиялық Ауданы, Шихэцзы Қаласында орналасқан. Бұл Қытайдың білім министрлігі мен Шыңжаң өндірістік-құрылыс корпусы бірлесіп салған ұлттық негізгі университет. 1949 жылы құрылған оқу орнында, бүгінде 40 000-ға жуық студент білім алады. Оқытушылар мен қызметкерлер саны 3000-ға жуықтайды.

KazNARU Баспасөз қызметі