«БІЛІМ ЖӘНЕ МАНСАП-2024»: KazNARU «ATAKENT-EXPO» ХАЛЫҚАРАЛЫҚ КӨРМЕСІНЕ ҚАТЫСАДЫ

2024 жылдың 20-22 қарашасы аралығында Қазақ ұлттық аграрлық зерттеу университеті «Atakent-Expo» халықаралық көрмесіне қатысады. ХХІІІ қазақстандық халықаралық көрме «Білім және мансап-2024» тақырыбы аясында өтеді.

«Atakent-Expo» халықаралық көрме орталығындағы ауқымды шара Қазақстан Республикасы Ғылым және жоғары білім Министрлігінің, Алматы қаласы әкімдігінің, «Қазақстан Республикасының Ұлттық мемлекеттік Кітап палатасы» РММ және Қазақстанның баспагерлері, полиграфистері мен кітап таратушылары қауымдастығының ресми қолдауымен ұйымдастырылып отыр.

«Білім және мансап» көрмесі білім берудің барлық деңгейлері, заманауи оқыту технологиялары, оқу жабдықтары мен құралдары, жаңа оқу бағдарламалары саласындағы жетістіктерді жиырма жылдан бері ұсынып келеді. Сонымен қатар, талантты жастарды үздік оқу орындарымен байланыстыруға, бағыт-бағдар беруге, баспалдақ болуға тырысады.

3 күндік бағдарлама аясында еліміздің ең үздік жоғары оқу орындары және алыс-жақын шет елдің жетекші университеттерінен мазмұнды, тағлымды презентациялар, семинарлар, тестілеу және оқуға арналған түрлі ұтыс ойындары ұсынылады.

Осылайша, халықаралық көрме білім ордаларының өз мүмкіндігін көрсетуіне, таныстыруына кеңінен жол ашады. Әрі тәжірибе алмасуда таптырмас ғылым алаңына айналмақ.

10 павильонда KazNARU 135 орынға орналасады.

KazNARU Баспасөз қызметі