АЛМАТЫДА ҮЗДІК ЖОО МЕН ШЕТ ЕЛДІК ЖЕТЕКШІ УНИВЕРСИТЕТТЕРДІҢ БАСЫН ҚОСҚАН «БІЛІМ ЖӘНЕ МАНСАП-2024» ХАЛЫҚАРАЛЫҚ КӨРМЕСІ ЖАБЫЛДЫ
Алматыдағы «Atakent» халықаралық көрме орталығында 2024 жылдың 20-22 қараша аралығында өткізілген жылдың ең негізгі, ауқымды іс-шарасы аяқталды. «Білім және мансап – 2024» дәстүрлі халықаралық көрмесі отандық ЖОО мен алыс-жақын шет елдің көптеген жетекші университеттерінің, ірі компанияларының басын қосқан еді.
«Білім және мансап – 2024» атты «ATAKENT-EXРО» XXIII Халықаралық көрмесіне Қазақ ұлттық аграрлық зерттеу университеті де қатысты. Университет өкілдері қатарында Басқарма Төрағасы - Ректордың орынбасары Әбдіров Айтжан Мұхамеджанұлы, қабылдау комиссиясының директоры-жауапты хатшы Қайырбаева Айнұр Елтайқызы, «Агробиология» факультетінің деканы Абильдаев Ержан Советбекович және «Су шаруашылығы және IT» факультетінің деканы м.а. Набиоллина Мадина Сагиоллаевна қатысты.
Аграрлық салада жетекші жоғарғы оқу орны саналатын KazNARU 3 күндік іс-шарада кәсіби бағдар беру жұмыстарын жүргізді. 10 павильонда 135 орынға орналасқан университет болашағын бағдарлауға ұмтылған жас буынға барынша бағдаршам болуға күш салды. Көрме аралаған колледж, мектептің бітіруші түлектеріне оқу орнының бүгінгі даму үрдісін, озық технологиялармен жабдықталған ғылыми-зерттеу лабороториялары мен инновациялық орталықтары жөнінде кең мағлұмат берді. Білім бағдарламаларымен таныстырып, тарихы терең университеттегі мамандықтар мүмкіндігі туралы мағыналы мәлімет ұсынды.
Іс-шара Қазақстан Республикасы Ғылым және жоғары білім Министрлігінің, Алматы қаласы әкімдігінің, «Қазақстан Республикасының Ұлттық мемлекеттік Кітап палатасы» РММ және Қазақстанның баспагерлері, полиграфистері мен кітап таратушылары қауымдастығының ресми қолдауымен ұйымдастырылып отыр.
«Білім және мансап» көрмесі аясында «Ұлы жібек жолымен-2024» тақырыбымен XII халықаралық кітап және полиграфия көрмесі де келушілер назарына ұсынылды.
«Білім және мансап – 2024» көрмесі білім берудің барлық деңгейлері, заманауи оқыту технологиялары, оқу жабдықтары мен құралдары, жаңа оқу бағдарламалары саласындағы жетістіктерді жиырма жылдан бері ұсынып келеді. Сонымен қатар, талантты жастарды үздік оқу орындарымен байланыстыруға, бағыт-бағдар беруге, баспалдақ болуға тырысады.
KazNARU Баспасөз қызметі
