KazNARU БЕЛСЕНДІ ЖАСТАРЫ «JANA BELES - 2024» ФЕСТИВАЛІНДЕ ҮЗДІКТЕР ҚАТАРЫНАН КӨРІНДІ
Қазақ ұлттық аграрлық зерттеу университетінің белсенді студенттері «JANA BELES - 2024» фестиваліне қатысты. 27 қараша күні өткізілген жүлделі жарыста Алматы қаласының «Ең үздік студенті» мен «Ең үздік студенттік өзін-өзі басқару ұйымы» анықталды.
Алматы қаласы Жастар саясаты басқармасының қолдауымен, Жастар Рухы қоғамдық қоры ұйымдастыруымен, “Жастардың өзін-өзі басқару органдарының қызметін дамыту және қолдау” жобасы аясында қаладағы 35 жоғарғы оқу орны ішінен тек 4 университет қана «Ең үздік өзін-өзі басқару студенттік ұйымы» номинациясы бойынша жеңімпаз деп танылды.
Жеңімпаздар қатарында университетіміздің белсендісі, студенттік өзін-өзі басқару ұйымының көшбасшысы Күзен Назеркеге диплом және 350 мың теңгелік сертификат табыс етілді. Ең үздік өзін-өзі басқару студенттік ұйымы жеңімпаздары тізімінде әл-Фараби атындағы ҚазҰУ және Қыздар университеті, Логистика және көлік академиясы (ALT) да бар.
«Ең үздік студенттік өзін-өзі басқару ұйымын» анықтау конкурсында портфолио, мотивациялық хат, «Менің университетім» тақырыбында видео, өзін-өзі басқару ұйымының қол жеткізген жетістіктерін саралау бағытында сайыстар өтті.
Ал «Ең үздік студент» номинациясында 30 студент бақ сынады. Оқу ордамыздың 2 курс студенті, «Ветеринария және зооинженерия» факультетінің студенттік деканы Аслан Қадыр үздіктер қатарынан табылды. Осылайша 10 үздік студентке Almaty Leaders жобасының аясында 50 000 теңге көлемінде ынталандыру сыйақысы табысталды. Дипломмен марапатталды.
«Jana Beles – 2024» фестивалінің негізгі мақсаты – жастарды біріктіріп, олардың көшбасшылық әлеуетін дамытуға және үздік студенттерді марапаттауға жағдай жасау.
Университетіміздің белсенді жастарын жеңістерімен құттықтаймыз!
KazNARU Баспасөз қызметі
