KazNARU КӘСІБИ БАҒДАР БЕРУ ЖҰМЫСТАРЫ АЯСЫНДА БАЛҚАШТА ӨТКЕН ЖОО-НЫҢ БІЛІМ КӨРМЕСІНЕ ҚАТЫСТЫ

2024 жылдың 28 қарашасында Қазақ ұлттық аграрлық зерттеу университеті Қарағанды облысы, Балқаш қаласындағы оқушылар сарайында «Болашаққа жол: мамандық таңдау – 2024» тақырыбымен ұйымдастырылған кәсіби бағдар беру бағытындағы білім көрмесіне қатысты.

Іс-шараны «Қазақмыс» корпорациясының қолдауымен «Ұлытау» қайырымдылық қоры өткізіп отыр. Онда еліміздегі бірқатар жетекші жоғарғы оқу орындары болашақ талапкерлерге өз мүмкіндіктерін ұсынуда.

Қазақ ұлттық аграрлық зерттеу университеті де бұл білім көрмесінде оқу ордасының үздіктер қатарында екенін таныстыратын презентациясын ұсынды.

Кәсіби бағдар беру жұмыстары аясында университетіміздің «Аккредитация және рейтинг» секторының жетекші маманы Төкенова Жансая Бексұлтанқызы және «Су ресурстары және мелиорация» кафедрасының аға оқытушысы Оңласын Ұлжан Қуанышбекқызы мектеп бітіруші түлектерге білім қабырғасының бүгінгі даму үрдісімен, озық технологиялармен жабдықталған ғылыми-зерттеу лабороториялары және инновациялық орталықтары жөнінде кең мағлұмат берді.

Сонымен қатар, білім бағдарламаларымен таныстырып, тарихы терең университеттегі мамандықтар мүмкіндігі туралы мағыналы мәлімет ұсынды.

Шынында, бүгінде заман ағымына сай мамандықты дұрыс таңдай білу маңызды қадамның бірі. Әсіресе, буыны қатпаған жас шақта бағдарыңды бұрған бағдаршамың болашақта бағыңың ашылуына тікелей түрткі. Ал агросалада білім көшбасшысына айналған KazNARU болашақ талапкерлер үшін тағлымды орта, таңдаулы мамандықтар тізімін ұсына алатын бірден бір жоғарғы оқу орны!

KazNARU Баспасөз қызметі