АҒА БУЫН ЖОЛЫ - ҰРПАҚҚА МҰРА!
Қазақ ұлттық аграрлық зерттеу университеті «Ветеринария және Зооинженерия» факультеті, «Зооинженерия және биотехнология» кафедрасы азаматтық-патриоттық және полимәдени тәрбие беру бағытында «Аға буын жолы - ұрпаққа мұра» атты танымдық-тәрбиелік іс-шара ұйымдастырды.
Іс-шарамыздың құрметті қонағы ауылшаруашылығы ғылымдарының докторы, профессор, ҚР ҰҒА академигі, Қазақстанның еңбек сіңірген ғылыми қайраткері, Әл-Фараби атындағы ғылым және техника саласындағы ҚР Мемлекеттік сыйлығының Лауреаты, «Ерен еңбегі үшін» медалінің иегері, ғалым Садықұлов Төлеухан Садықұлұлы.
Кездесуге кафедрамыздың студенттері, магистранттары және профессор – оқытушылар құрамы қатысты. Ғалым туып-өскен жері Шығыс-Қазақстан облысының Шаған ауылында өткен балғын балалық дәуреннен бастап, студенттік шақтың әдемі естеліктерімен, ғылымға бет бұрған сәтті, ғылым жолындағы ізденістері, ұстаздары, отбасылық өмірі және ғылыми еңбектері туралы әңгімелеп берді.
Академик Садықұлов Т.С. малшаруашылығының жетістіктері, мал тұқымдары, «дегересс» қой тұқымының шығу тарихы, азық-түлік мәселелері, биотехнологияның әдістері, ұстаздық, адамгершілік, қарапайымдылық, білімділік, тәлім-тәрбие, спортпен шұғылдану т.с.с көптеген маңызды мәселелер бойынша сөз қозғады. Кездесу барысында студенттер ғалымға сұрақтар қойып, әсерлі әңгіме өрбітті. Іс-шара білім алушыларға ерекше әсер қалдырып, ғылымға деген қызығушылықтарын арттырды.
Кеш соңында кафедра меңгерушісі Құлатаев Бейбіт Тұрғанбайұлы сөз алып, біз өз елін сүйетін, қорғайтын, салт-дәстүрін құрметтеп, түп-тамырын, тарихын, әдебиеті мен мәдениетін, ғылымын, тілін терең білетін, онымен мақтанатын, өзге елдің азаматтарымен бәсекеге барынша қабілетті, терең білімді, мәдениетті, денсаулығы мықты, өзін-өзі сыйлата білетін жастарды тәрбиелеуіміз керек, Садықұлов Төлеухан Садықұлұлы Сіздің бүгінгі жастармен кездесуіңіз жастарымызға берері мол кездесу болды деп жүрекжарды тілегін айтып, алғысын білдірді. Іс-шара соңында жас буын ғалыммен естелік суретке түсті.
Ұйымдастырушылар: т.ғ.м., Валиева Г.А., т.ғ.м. Спатай Н.Н.
KazNARU Баспасөз қызметі
