«ІС ЖҮЗІНДЕГІ ӘДІЛЕТТІ УНИВЕРСИТЕТ»: АҚЫЛБЕК КҮРІШБАЕВ KazNARU СТУДЕНТТЕРІМЕН КЕЗДЕСТІ
2024 жылдың 2 желтоқсанында Қазақ ұлттық аграрлық зерттеу университетінің Басқарма төрағасы-Ректоры, ҚР Президенті жанындағы Ұлттық Ғылым академиясының Президенті, академик Ақылбек Қажығұлұлы Күрішбаев «Іс жүзіндегі әділетті университет» тақырыбы аясында студенттермен кездесу өткізді. Университет басшысы өз сөзінде соңғы 2 жыл аралығында мұндай маңызды іс-шараның төртінші рет ұйымдастырылып отырғанын атап өтті. Алғашқы кездесу 2022 жылдың желтоқсанында «ҚазҰАЗУ студенттері - әділетті университет үшін!» тақырыбында өткен болатын.
Осы орайда, Жастар ісі жөніндегі комитетінің жетекшісі, PhD доктор Әшірәлі Сманов соңғы жылдары оқу ордасында атқарылған игі істер мен жетістіктерге, студент жастарға жасалып жатқан әлеуметтік қолдаулардың студенттер тарапынан ризашылыққа ие болғаны туралы есеп берді.
«Бәріміздің есімізде, алғашқы кездесуде студенттердің әлеуметтік жағдайлар жөнінде басшылыққа шағымдары өте көп болды. Осыны ескерген университет ректоры Ақылбек Қажығұлының бастамасымен қара шаңырағымызда үлкен істер атқарылды. Қазір университетіміз - Алматы қаласы бойынша білім алушыларын жатақханамен толық қамтамасыз еткен жалғыз оқу орны атанды. Осындай қолдаудың арқасында университет студенттері халықаралық, республикалық және қалалық жарыстарда, конкурстарға қатысуға мүмкіндік алып, жеңімпаздар қатарынан көрінуде. Биылдың өзінде қалалық жоғары оқу орындары арасында өткен «Жаңа белес-2024» фестивалінде «Ең үздік топ», «Ең үздік студенттік өзін-өзі басқару ұйымы», «Ең үздік студент» аталымдары бойынша біздің университет жастары жеңіс тұғырына көтерілді. Бұл бәріміздің ортақ еңбегіміздің жемісі», - деді ол.
Бұдан кейін кездесу модераторы - Жастар ісі жөніндегі комитет маманы Абдықалық Еркебай студент жастардың университет ректорымен ашық сұхбатын жүргізіп отырды. Білім алушылар, белсенді жастар заман талабына сай барлық жағдайды жасап отырған университет ректорына өз алғыстарын білдіре отырып, ұсыныс-пікірлерін ортаға салды.
Нұрасыл Аманғазы, 5 курс студенті: «Мен осында оқығалы бес жылда ашық, жариялылық тұрғысындағы бұндай кездесулер тек соңғы екі жылда ғана дәстүрге айналды. Студенттермен осылай ашық кездесудің пайдасы өте зор. Біз ректорымыздың ашықтық, әділеттілік принциптерін берік ұстану туралы бастамасын толық қолдаймыз. Мысалы, мен екі жыл бұрын осы залда тұрып, әскери кафедраға түсудің ашық жүргізілмейтіні туралы айтқан болатынмын. Қазір әділеттілік орнап, әскери кафедраға таза конкурс арқылы өтіп, кафедраны сәтті аяқтап шықтым. Сол үшін университет басшылығына көп рақмет! Тағы айта кететін жайт, студенттердің спортқа деген құлшынысы артты, соңғы екі жылда спорттық турнирлер мен спартакиадалар өткізу жүйелі қолға алынды. Сол себептен біздер спорттың әр алуан түрлерінен секцияларға қатысып, қалалық, республикалық жарыстарға барып, жүлделі орындар алып жүрміз. Студенттерге осындай нақты қолдау көрсету - әділетті университеттің шынайы нышаны деп ойлаймыз».
Әділхан Кәрібай, «Су ресурстары және IT технологиясы» факультетінің 3 курс студенті қазір елімізде су ресурстарын басқару мамандығының аса өзекті екенін айта келе, өзінің ғылыми жобасын ортаға салды. Ол ГИС технологиялармен жұмыс істеуге маңыздылық берудің қажеттілігін айта отырып, стартап жобаларды қолдау мен студенттердің ғылыммен айналысуының қоғамға берер пайдасының молдығына тоқталды.
«Ветеринария және зооинженерия» факультетінің 3 курс студенті, университеттегі би тобының жетекшісі Жетпісбай Мөлдір бұған дейінгі барлық кездесуге қатысып, сол шаралардағы ұсыныс-пікірлердің іске асып, үлкен өзгерістердің куәсі болып отырғанына тоқталып, «Енді жатақханалардағы би залдарымызды жөндеуден өткізіп берсе», - деген өтінішін білдірді.
«Орман шаруашылығы және жер ресурстары» факультетінің студенті Көмекбай Сабина соңғы екі жылда университеттің халықаралық байланыстарының нығаюына риза екенін атап айтып, енді терең білім алу үшін қытай, ағылшын, француз тілдерін үйрететін курстарын ашу туралы ұсынысын білдірді. «Бизнес және құқық жоғары» мектебінің 2 курс студенті Қыдырбай Аружан Бауыржанқызы «біздің жаңа логотиппен жасалған бренд өнімдеріміз бен киімдеріміз өзімізге қатты ұнайды. Енді басқа универлер сияқты өз логотипімізбен значоктарымыз болса, ол белсенді студенттерге, бітіруші түлектерге табыс етілсе, керемет болар еді» деген тілегін білдірді.
Кездесуде студенттер тарапынан болашақта университет базасында қалалық және республикалық деңгейде іс-шаралар өткізу, студенттердің ғылыми жұмыстарына арнайы грант бөлу, №10 жатақхана алдында арнайы спорт жаттығуларының алаңқайын орнату, академиялық ұтқырлық аясын кеңейту, этноансамбльді ұлттық аспаптармен қамтамасыз ету, олимпиадалар мен конференцияларға, шығармашылық конкурстарға қатысу туралы және тағы басқа көптеген ұсыныстарын айтты.
Университет басшысы Күрішбаев Ақылбек Қажығұлұлы жастардың әрқайсысына жеке-жеке толымды жауап беріп, атқарылып жатқан істердің барлығы да тек студенттердің жақсы білім алып, алаңсыз оқуы үшін жасалып жатқан жағдай екенін атап өтті.
«Соңғы екі жыл ішінде осындай ауқымды істердің арқасында материалдық-техникалық база нығайды. 30 жылда бірінші рет университет территориясында 450 орындық 9 қабатты заманауи үлгідегі жатақхана мен медициналық орталық құрылысы салынып жатыр. Әлеуметтік жағдайларды жақсарту және кәсіптік бағдар беру жұмысын жандандыру есебінен 2024 жылы студенттерді қабылдау 2 есеге өсті, оқу сапасы жоғарылады, әділетті университет құрудың нақты қадамдары жасалды. Осындай игі істердің жүзеге асуына өздеріңіздей студент жастар белсене қатысты. Білім алушылар үшін жасалатын мүмкіндіктер әлі де жалғасады. Бүгінде цифрлық университет жұмыстары жүйелі жолға қойылуда, белсенді студент жастарды қолдауға арналған көптеген жобалар іске асуда. Менің өзімде студент кезімде көшбасшы болдым. Сендерге де көшбасшылық, белсенділік көрсетеді деп үлкен үміт артамын!» - деді сөзінің соңында университет басшысы.
Сонымен қатар, Ақылбек Қажығұлұлы кездесуге қатысқан жастарға саналы ұрпақ, адал азамат болып қалыптасудың адал қоғам құрудағы мәніне, студенттердің сапалы білімді игеріп, ғылыммен терең айналысуының, олардың жоғары азаматтық ұстанымының, көшбасшы болуының - ел болашағы үшін маңыздылығы туралы тағылымды, мазмұнды ой-пікірін айтты. Тәуелсіздік мерекесіне орай, ең белсенді студенттерді ынталандыру мақсатында сыйақымен марапаттайтынын жеткізді. Бұл үрдіс өткен жылдан бері дәстүрге айналғанын атап өткен жөн.
Кездесу соңында Ақылбек Қажығұлұлы бір топ белсенді студенттерді Құрмет грамотасымен марапаттады.
KazNARU Баспасөз қызметі
