ҚР ПРЕЗИДЕНТІНІҢ КЕҢЕСШІСІ МӘЛІК ОТАРБАЕВ KazNARU ҰЖЫМЫ ЖӘНЕ СТУДЕНТТЕРМЕН КЕЗДЕСТІ
Мемлекет басшысы Қасым-Жомарт Кемелұлы Тоқаевтың ІV Ұлттық құрылтайда берген тапсырмаларын талқылау мақсатында ҚР Президентінің кеңесшісі Мәлік Отарбаев Қазақ ұлттық аграрлық зерттеу университетінің профессор-оқытушы құрамы және білім алушыларымен кездесіп, оқу ордасының инфрақұрылымымен танысты.
Жиынға KazNARU Басқарма төрағасы – Ректор, ҚР ҰҒА Президенті, ҚР Ұлттық құрылтай мүшесі Ақылбек Күрішбаев модераторлық жасап, Президент тапсырмаларының оқу орнында орындалу барысына кеңінен тоқталды.
«Ең алдымен, Ұлттық құрылтайдың IV отырысында Мемлекет басшысы отандық ғылымның әлеуетін арттыру, білім беруді дамыту және жастарды тәрбиелеу үшін жүйелі шаралар қабылдауымыз қажеттігіне баса назар аударды. Президенттің қолдауымен 2019 жылдан бастап, біздің елімізде білім мен ғылымға бөлінетін қаражат 5 есе өсті. Бұл ғылыми ұйымдар мен жоғары оқу орындары үшін өте маңызды қадам. Осындай нақты қолдаудың нәтижесінде біздің KazNARU заманауи зерттеу университетіне айналуда. Университетті дамытудың 2025-2029 жылдарға арналған жаңа бағдарламасы әзірленді. Оны қаржыландыруға жалпы қажеттілік 36,3 млрд.теңгені құрайды, оның ішінде республикалық бюджет қаражаты есебінен 27,3 млрд. теңге қарастырылған. Нәтижесінде оқу ордамыздың материалдық-инфрақұрылымдық базасы нығайып, әлемдік деңгейдегі озық университеттердің қатарынан көрінуге мүмкіндік туды. Ұлттық құрылтайдың бастамалары университетіміздің одан ары дамуына ықпал етітіне сеніміз мол», - деді Ақылбек Қажығұлұлы.
Әлемдегі жетекші зерттеу жоғары оқу орындарының тәжірибесі бойынша ҚР Ауыл шаруашылығы министрлігінің 4 ғылыми-зерттеу институты және 1 тәжірибелік шаруашылығы біздің университеттің сенімгерлік басқаруына берілді. Бұл білім беру процесін ғылыми-зерттеу қызметімен ұштастыруға мүмкіндік берді. Соңғы 2 жылда университеттің ғалымдары жүзеге асыратын ғылыми жобаларды қаржыландырудың жалпы көлемі 4 есеге ұлғайып, ол 3 млрд. теңгені құрап отыр.
Университетте халықаралық ғылыми-білім беру байланыстарын дамыту бойынша кешенді іс-шаралар жүргізілуде. Шетелдік жетекші оқу орталықтарымен бірлесіп 7 қос дипломдық білім беру бағдарламасы іске асырылуда. 2024 жылы жаңадан «Су ресурстары» факультеті құрылды. Мемлекет басшысының қолдауымен «Ташкент ирригация және ауыл шаруашылығын механикаландыру инженерлері институты» Ұлттық зерттеу университетінің филиалы құрылды, онда екі дипломдық білім беру бағдарламалары негізінде су саласына мамандар даярлануда. Су ресурстарын басқару бойынша әлемдегі жетекші жоғары оқу орны – Небраска Линкольн университетімен (АҚШ) бірлескен Экстеншн орталығы жұмыс істеуде. Қазіргі таңда университет базасында аталған университеттің филиалын ашу бойынша жұмыстар жүргізілуде.
ҚХР-дың 40-қа жуық университеттерімен ынтымақтастық орнатқан KazNARU базасында «Ақылды ауыл шаруашылығы орталығы» және «IT-технологияларды пайдалана отырып, құрғақ өңірлерде су ресурстарын тиімді пайдалану жөніндегі халықаралық зертхана»; «Ауыл шаруашылығы дрондарын басқаруды оқыту және зерттеу орталығы»; «Агротехнология және ландшафтық сәулет халықаралық ғылыми-зерттеу орталығы» және тағы басқа көптеген ғылыми орталықтар құрылуда. Нәтижесінде KazNARU QS әлемдік рейтингінде қазақстандық жоғары оқу орындары арасында бесінші, Орталық Азия жоғары оқу орындары арасында алтыншы орынға көтерілді.
Сондай-ақ, ректор Қазақстанның ауыл шаруашылығын тиімді дамытудың негізгі бағыттарын белгілей отырып, Мемлекет басшысының «алдағы бес жылда ауыл шаруашылығы өнімінің жалпы өндірісін 2 есеге және саладағы еңбек өнімділігін 3 есеге арттыру қажет» деген тапсырмасы аграрлық саланы жаңа деңгейге көтеретінін атап өтті.
«Қазіргі заманда экономиканың тірегі инновация. Сондықтан біздің алдымызда ғылыми жаңалықтарды коммерцияландыруды қамтамасыз ете отырып, ғылым мен өндірістің байланысын күшейту міндеті тұр. Біз бұл міндетті орындауға бар күш-жігерімізді жұмсаймыз», - деді Ақылбек Күрішбаев.
Бұдан кейін KazNARU академиялық мәселелер бойынша департамент директоры, ветеринария ғылымдарының кандидаты, қауымдастырылған профессор Гүлмира Алпысбаева «Қазақстандық қоғамның рухани даму мәселелері»; Ғылыми-білім беру технологиялық платформасының атқарушы директоры Фараби Ермеков «Ғылымды цифрландыру, ақылды ауыл шаруашылығын дамыту - мамандардың бәсекеге қабілеттілігін арттыратын басты факторлар»; А.ш.ғ.к. «Орман ресурстары, аңшылықтану және балық шаруашылығы» кафедрасының доценті Талғат Кертешев «Еліміздің биологиялық алуан түрлілігін қорғау» тақырыбында баяндама ұсынып, «Инженерлік технологиялар» факультетінің 3 курс студенті Мөлдір Жетпісбай «Жастар – қоғамның қозғаушы күші. Ұлттық құрылтайда талқыланған мәселелер» туралы өз пікірін білдірді.
Жиында ҚР Президентінің кеңесшісі Мәлік Отарбаев Президенттің Құрылтайда айтқан ұлттық бірегейлікті сақтаудағы ойларымен бөлісті.
«Озық ойлы ұлт болу үшін бүкіл қоғам сана-сезімін өзгертіп, жаңа құндылықтарды орнықтыруы керек. Әрбір адам «адал азамат» деген атқа лайық болса, елімізде әділ қоғам орнайды. «Адал адам – адал еңбек – адал табыс» – бір-бірінен ажырамайтын ұғымдар. Осы үш таған – озық әрі табысты елге айналудың басты кілті», – деген Мемлекет басшысының ұлттық құндылықтарды көтеру, тарихымыздағы ұлы тұлғалардың еңбек жолдары мен ел үшін жасаған ерліктерін, батырлығын, даналығын дәріптеу қажеттігін ұсынды.
«Әр салада адалдық басты орында тұруы тиіс» деген Президент талабын жүзеге асыруда жастардың әлеуметтік-экономикалық дамуға қосар үлесі зор болмақ және осы бағытта қоғам болып ұйысып, бірлесіп жұмыс атқаруды жүйелі жалғастыруымз қажет», - деді Мәлік Нұржанұлы.
KazNARU Баспасөз қызметі
