ЖАСТАРДЫҢ ТАҢДАУЫ – KazNARU
Ежелден халқымыздың алтын тамыры – атамекен ауылымыз. Еліміздегі аграрлық салаға білікті мамандар даярлайтын жетекші оқу ордасы – Қазақ ұлттық аграрлық зерттеу университетіне оқитын студент жастардың басым бөлігі осы ауылдан шыққан түлектер.
KazNARU «Кәсіптік бағдар беру» жобасы аясында еліміздің оңтүстік өңірлеріндегі ауыл мектептеріне профессор-оқытушылар құрамы мен белсенді студенттерден жасақталған арнайы топтарды аттандырды.
Негізгі мақсат – мектеп бітірушілерге болашақ мамандығын дұрыс таңдауға бағыт беру, ауылшаруашылығы маманы боламын деген талапкерлерге университет факультеттерінің ерекшелігін таныстыру.
Қазіргі уақытта «Ветеринария» факультетінің «Клиникалық ветеринариялық медицина» кафедрасының аға оқытушысы Үмбетжанов Қайырбек Жексенәліұлы, «Ветеринариялық санитариялық сараптау және гигиена» кафедрасының ассистенті Зарханова Ажар Жеңісбекқызы және 3 курс студенттері Айсұлу Ибраим, Гүлден Сағат кәсіби бағдар беру жұмыстары бойынша Жетісу облысының 8 ауданы мен 2 қаласын аралап жүр.
Бұл маңызды жұмыстарға облыс пен аудандардың білім басқармалары, мектептердің профориентолог мамандары да белсенділікпен қолдау көрсетуде. Кездесулер барысында ынтымақтастық туралы екіжақты Меморандумға қол қойылуда. Өйткені, атқарылатын міндет баршаға ортақ – мектеп бітірушілердің бейімділігі мен қабілеттеріне сай кәсіптік қызығуышылығын ояту, белгілі бір мамандық түрлерін меңгеруге бағыттау.
Ұйымдастырушылардың айтуынша, әрбір кездесуге мектеп бітірушілер ықыласпен қатысып, өздерін толғандырған түрлі сауалдарын қойып, тиянақты жауап алуда. Жас өрендерге KazNARU туралы ақпарат жарияланған буклеттер, қосымша материалдар беріліп, қызықты викториналар мен тренингтер жүргізілуде.
Өз кезегінде ару қала Алматыда білім алып, білікті маман атануға құлшыныс танытып отырған жастар да аз емес.
Осындай талапты жастардың KazNARU мен шет елдік озық университеттерде қатар оқып, екі дипломға ие болғылары келсе, есігіміз әрқашан ашық!
KazNARU әлемдік «QS Asia» рейтингісі бойынша Орталық Азияда үздік жоғары оқу орындары арасында 6-шы орында, «QS Sustainability» рейтингісінде Қазақстан бойынша 5-ші орындағы университет.
Бізді таңдау арқылы сіздер үлкен өмірге жолдама аласыздар!
Аграрлық мамандықтар сіздерді зор табыстар мен жетістіктерге бастайды!
KazNARU Баспасөз қызметі
