KazNARU СТУДЕНТТЕРІНІҢ XXІ ФАКУЛЬТЕТАРАЛЫҚ СТУДЕНТТЕР СПАРТАКИАДАСЫ
2024 жылдың 16 наурызында Қазақ ұлттық аграрлық зерттеу университетінің спорт залында XXІ факультетаралық студенттер Спартакиадасының ашылу салтанаты болып өтті.
Спартакиаданың негізгі мақсаты – студенттерді дене шынықтыру және спортпен тұрақты айналысуға тарту, сондай-ақ олардың денсаулығын нығайту, спорттық шеберлігін жетілдіру, жаңа чемпиондарды анықтау болып табылады.
Жарысқа қатысушыларды университет басшылығы атынан KazNARU Академиялық мәселелер жөніндегі Атқарушы директоры - Проректор Абдыров Айтжан Мухамеджанұлы спорт жарысының ашылуымен және Наурыз мерекесімен құттықтады.
«Спартакиадаға қатысушы студенттер мен қонақтар! Кез келген елдің болашағы – денсаулығы мықты жастар. Университет басшылығы тарапынан бұл мәселеге үлкен мән беріліп келеді, студенттерге спортпен айналысуға барлық жағдай жасалған. Осы факультетаралық спартакиада – бұқаралық спорт түрлерін дамытуға бағытталған басты шаралардың бірі. Биыл елімізде Наурыз мейрамын тойлаудың жаңа форматы енгізілді. Бүгінгі 16 Наурыз – Мәдениет және ұлттық салт-дәстүр күні құтты болсын!» - деді Айтжан Мұхамеджанұлы.
Спартакиаданың ашылу рәсміне факультет декандары – Ержан Абилдаев, Ләззат Әлдібаева, Гүлмира Алпысбаева, Бибипатыма Еренова, Динара Ажинурина, ардагер спортшылар мен студенттер қатысты. Талантты жастардан құралған би тобы өнер көрсетіп, жиналғандарға тамаша көңіл-күй сыйлады.
Студенттеріміз спорттың 9 түрінен: баскетбол, волейбол, футзал, тоғызқұмалақ, үстел үсті теннисі, қол күресі, креативті спорт номері бойынша сайысқа түседі.
Биылғы Спартакиада бағдарламасына жаңа бағыт кіріп отыр, ол Спорттық креативтік номер. Бүгінгі күні жастар өз қызығушылықтары бойынша заманауи спорт түрлерімен: Джамп Роуп, Джаз-фанк, хип-хоп, брейк-данс және акробатикалық билерге әуес. Сондықтан студенттер арасынан осы креативті номер дайындап шығару ұсынылды.
Спартакиаданың Бас хатшысы – Арзиев Шохрат Авакримұлы.
Айта кетейік, KazNARU студенттері республикалық деңгейде әртүрлі спорт түрінен жарыстарға қатысып, университетіміздің имиджін көтеріп жүр. Мысалы, 2024 жылдың 10-11 ақпан аралығында Алматы қаласының самбо күресі чемпионатына қатысқан «Инженерлік-техникалық» факультетінің 1 курс студенті Ақнұр Тәңірберген 64 кг салмақта 1-орын; «Бизнес және құқық Жоғары мектебінің» студенті Кенжебек Темірлан 2 орын; «Ветеринария» факультетінің 1 курс студенті Жахан Бекнур 88 кг салмақта 3-орынға ие болды. Жеңімпаздарды Айтжан Абдыров марапаттады.
«Дене тәрбиесі және спорт» кафедрасының меңгерушісі, Дзю-до күресінен спорт шеберілігіне кандидат Меруерт Тұяқбаева спортты дамытуға үлкен қолдау көрсетіп отырған университет басшылығына алғыс білдірді.
Бүгін Спартакиада бағдарламасы бойынша алғашқы ойындардың жеңімпаздары мен жүлдегерлері анықталды.
ТОҒЫЗҚҰМАЛАҚ ОЙЫНЫНДА КОМАНДАЛЫҚ ЕСЕПТЕ:
І орын – «Агробиология» факультеті
ІІ орын – «Зооинженерия және тағам өндірісінің технологиясы» факультеті
ІІІ орын – «Инженерлік-техникалық» факультет
ВОЛЕЙБОЛ (ЖІГІТТЕР АРАСЫНДА):
І орын – «Су, жер және орман ресурстары» факультеті
ІІ орын – «Инженерлік-техникалық» факультет
ІІІ орын – «Агробиология» факультеті
Жеңімпаздар грамоталармен және кубок, медальдармен марапатталды.
Факультеттер атынан додаға түсіп отырған барлық командаларға күш-қуат, жеңіске деген жігер тілейміз!
KazNARU Баспасөз қызметі.
