ҰЛЫСТЫҢ ҰЛЫ КҮНІ ҚҰТТЫ БОЛСЫН!
KazNARU Басқарма Төрағасы - Ректор, ҚР ҰҒА Президенті Ақылбек Күрішбаев ұжым мен профессор-оқытушылар құрамын, білім алушыларды Әз-Наурызбен құттықтап, жаңа Жыл басын университет жақсы табыстармен қарсы алып отырғанын атап өтті.
2023 жылы KazNARU әлемдік «QS Asia» рейтингісі бойынша Орталық Азия үздік жоғары оқу орындары арасында 6 орынға, «QS Sustainability» рейтингісінде Қазақстан бойынша 5-ші орынға көтерілді.
Біздің әріптесетіріміз – Вагенинген университеті (Голландия), АгроПарижТех университеті (Франция), Небраска университеті (АҚШ), Хэнань ауылшаруашылық университеті (ҚХР), Малайзияның Паханг университеті, Эмираттағы Американдық Университеті екіжақты келісімшарт жасасып, алдағы уақытта бірлесе жұмыс істеуге уағдаласты.
KazNARU базасында «Ташкент ирригация және ауыл шаруашылығын механикаландыру инженерлері институты» ҒЗУ филиалын құру жұмыстары қолға алынуда.
Студенттеріміз осы аталған әлемнің озық оқу орындарында қатар оқып, халықаралық стандарттық үлгідегі екі диплом алып шығатын болады..
2023 жылы KazNARU құрамына 4 ірі ҒЗИ мен бір тәжірибелік шаруашылық беріліп, зерттеу университетінің жаңа деңгейіне көтерілді: ғылым – білім – өндіріс (яғни, зертхана – аудитория – тәжірибелік шаруашылық) жүйесі енгізілді.
KazNARU Алматы қаласындағы өз студенттерін жатақханамен толық қамтамасыз еткен жалғыз университет атанды. Қазіргі уақытта жаңадан 9 қабатты, 450 орындық студенттік жатақхана мен Медициналық орталықтың құрылысы жүріп жатыр.
Бұл аталған ортақ жетістіктер мен игілікті қадамдар KazNARU студенттеріне сапалы білім беріп, білікті маман атанып шығуына толық мүмкіндік береді.
«Басты мақсатымыз – жоғары оқу сапасына қол жеткізу, цифрлы университет құру, халықаралық талаптарға сай, нағыз ғылыми зерттеу оқу орнына айналу. Баршаңызға жаңа белестер, бірлік пен ынтымақтастық, жемісті еңбек, абыройлы биіктіктер тілеймін!», - деді университет басшысы Ақылбек Қажығұлұлы.
Жаңару мен жасампаздықтың бастауы – Ұлыстың Ұлы күні құтты болсын!
KazNARU Баспасөз қызметі
