Мамандық – өмір таңдауы!

2024 жылдың 26 наурыз айында «Агрономия» білім беру бағдарламасының 2-4 курс студенттерінің қатысуымен факультет деңгейінде «Мамандық – өмір таңдауы» атты дөңгелек үстел өтті.

Дөңгелек үстелдің мақсаты білім алушылармен ауылшаруашылығы өндірісі, нарығы және мүмкіндіктері жайлы ақпараттармен бөлісу.

Дөңгелек үстелге университетіміздің түлектері BASF Орталық Азия ЖШС-нің техникалық қолдау маманы Масалиев Нариман Мұхтарұлы және KWS компаниясының Қазақстан және Орта Азия бойынша жауапты басшысы Турегельдиев Бекзат Абуұлы шақырылды. Сонымен қатар факультет деканы Абилдаев Ержан Советбекұлы, жастар ісі жөніндегі комитет жетекшісі Сманов Әшірәлі, «Агрономия, селекция және биотехнология» кафедра меңгерушісі Жанбырбаев Елдос Алмабекұлы және «Агрохимия, топырақтану және экология» кафедрасының аға оқытушысы Аубакиров Нұрымжан Пәржанұлы қатысты.

Дөңгелек үстел қонақтары мамандық таңдау – бұл болашақта өз мақсаттарыңа қол жеткізуге мүмкіншілік беретін маңызды және жауапты қадам екенін атап өтті.

Кездесуде студент жастарға олардың маман ретінде қандай мүмкіндіктері бар екендігі жайлы, қандай жағдайларға дайын болу керектері жайлы ой-пікірлерімен бөлісті. Сонымен қатар студенттерге @agro_talgy қоғамдық бірлестігінде білімдерін шыңдай түсулеріне мүмкіндіктері бар екенін айтты.

«Әсемпаз болма, әрнеге,

Өнерпаз болсаң арқалан.

Сен де бір кірпіш дүниеге,

Кетігін тап та, бар қалан» — деп халқымыздың  ұлы ақыны, ойшылы, сазгері, қара сөздің қас шебері Абай Құнанбаев атамыз айтып кеткендей, кез келген адам «Өмір» деген атты дүниеде өз орнын табуға тырысады, яғни өседі, көреді, өнеді, тәрбиленеді. «Еңбекпен тапқан нан тәтті» демекші, қалаған мамандықтарының қызығын көреді. Ойдан ой туады. Ой арманға жалғасады. Адам баласының алға қойған мақсатының ішіндегі маңыздысы, мәндісі — оның мамандығы екені анық

Топ кураторы Барлыкова Н.Ә.