KazNARU XXI ФАКУЛЬТЕТАРАЛЫҚ СПАРТАКИАДАСЫНЫҢ ЖҮЛДЕГЕРЛЕРІ МАРАПАТТАЛДЫ
Қазақ ұлттық аграрлық зерттеу университеті студенттері арасында 2024 жылдың 10 наурыз – 26 сәуір аралығында болып өткен XXI факультетаралық спартакиадасының жүлдегерлері марапатталды.
Орталық стадионда өткен марапаттау салтанатына университеттің Басқарма төрағасы – Ректордың орынбасары Айтжан Абдыров, құрылым басшылары, факультет декандары, оқытушылар мен студенттер қатысты.
KazNARU-2024 факультетаралық студенттер Спартакиадасының бағдарламасында волейбол, шағын футбол, баскетбол, қол күресі, үстел теннисі, шахмат, тоғызқұмалақ сияқты спорт түрлерінен күш сынасқан жеңімпаздарға университет ректоры атынан қаржылай сыйлықтар мен дипломдар, грамоталар тапсырылды.
Факультетаралық командалық жарыстар қорытындысы бойынша:
Жүлделі 1-ші орынды «Инженерлік-техникалық факультеті» иеленіп, Кубок пен 300 000 теңгенің сертификатымен марапатталды.
2-ші орын «Су, жер және орман ресурстары» факультетіне бұйырып, Кубок пен 170 000 теңгенің сертификаты табысталады.
3-ші орынға «Ветеринария» факультеті ие болып, Кубок пен 120 000 теңгенің сертификаты табысталады.
Бұл жолғы Спартакиаданың ерекшелігі – өз студенттерін спортқа баулып, жарысқа баптап шығарған факультет басшылары үшін «Спорт жанкүйері - декан» номинациясы тағайындалып, осы марапатпен алғаш рет «Инженерлік –техникалық» факультетінің деканы Әлдібаева Ләззат Тұрғынбайқызы марапатталды.
Сондай-ақ, бұқаралық спортты дамыту, жастарды дене шынықтырумен және спортпен шұғылдануға тарту, талантты жас спортшыларды табу мақсатымен ұштасып жатқан іс-шараны жоғары дәрежеде ұйымдастырғаны үшін Дене тәрбиесі және спорт кафедрасының меңгерушісі Меруерт Тұяқбаеваға және кафедра ұжымына KazNARU Басқарма Төрағасы - Ректор Ақылбек Күрішбаевтың арнайы «Алғыс хаты» табысталды.
Жарысқа қатысып, жұлдызы жанған барлық жеңімпаздарды мерейлі жеңістерімен шын жүректен құттықтаймыз!
KazNARU Баспасөз қызметі
