2024 ЖЫЛ РЕКТОРЫ – АҚЫЛБЕК КҮРІШБАЕВ

Республикалық «ҚАЗАҚ ҮНІ» газеті мен QAZAQUNI.KZ ұлттық порталының 2024 жылғы «Жыл адамы» анықталды. Еліміздің еңселі болуы үшін еңбектеніп жүрген ел азаматтарының «жүзден жүйрік, мыңнан тұлпарларын» атап өту мақсатында, жыл сайын дәстүрлі түрде ұйымдастырылып келе жатқан осынау жоба аясында –оқырмандар өздері қалаған тұлғасына қолдау көрсетті.

Дауыс беру телефон сауалы, смс, электронды пошта хабарлары арқылы өткізілді. Барлық дауысты есепке ала отырып, арнайы құрылған Сарапшылар шешім шығарып, «Жыл адамы – 2024» байқауының жеңімпаздарын анықтады. Таныс болыңыздар!

Жыл ректоры – Ақылбек Күрішбаев! Қазақ ұлттық аграрлық зерттеу университетінің Басқарма төрағасы - ректоры, ҚР Президенті жанындағы ҰҒА Президенті, академик. Ғылым мен жоғары білімді дамытудағы үлкен жетістіктер оның есімімен тікелей байланысты. Іскер басшы, білікті ұйымдастырушы ретінде Қазақстан мен Польшаның ғылыми қауымдастықтарының өзара ынтымақтастығына үлкен үлес қосты.

Ақылбек Күрішбаевтың бастамасымен Қазақ ұлттық аграрлық зерттеу университетінің базасында АҚШ-тың жетекші оқу орны Небраска Линкольн Университетімен бірлесіп, өзара тиімді әріптестікті дамыту аясында «Еxtension services Орталығы» құрылды. ҚазҰАЗУ ғимаратында «Ташкент ирригация және ауылшаруашылығын механикаландыру инженерлері институты» ұлттық зерттеу университетінің филиалы ашылды. Студенттер екі дипломдық білім беру бағдарламасымен оқу мүмкіндігіне ие болды.

Қытайдың 40-тан астам озық университеттерімен, ғылыми зерттеу ұйымдарымен және компанияларымен белсенді ынтымақтаса отырып, су шаруашылығы, орман шаруашылығы агрономия, ветеринария, зооинженерлер, азық-түлік қауіпсіздігінің технологтары, жер кадастры мамандарын дайындайтын түрлі халықаралық орталықтар мен зертханалар ашылуына бастамашы болды. Ректордың осы еңбектері жоғары бағаланып, 2024 жылдың «Үздік ректоры» атанды.

ҚазҰАЗУ абыройын асқақтатып, Жыл ректоры атанған Ақылбек Қажығұлұлын мерейлі атағымен шын жүректен құттықтаймыз!

KazNARU баспасөз қызметі

https://qazaquni.kz/.../163485-zyl-adamy-2024-anyqtaldy...