KazNARU

KazNARU ЖАЙДАРМАНШЫЛАРЫ «КҮЛКІ – ЖАННЫҢ ШИПАСЫ» АТТЫ КӨҢІЛДІ КЕШ СЫЙЛАДЫ

✅ 2025 жылдың 1 сәуірінде Қазақ ұлттық аграрлық зерттеу университетінің Акт залында Көңілді тапқырлар клубының факультетаралық «Күлкі – жанның шипасы» атты көктемгі маусымдық мерекелік кеші болып өтті.

✅ Әрине, 1 сәуір ресми мереке емес, бірақ ежелден адамға әзіл мен шуақты көңіл-күй сыйлайтын бұл күн – Күлкі күні саналады. Шыққан жылы мен тегі беймәлім. Бірақ, әлемнің әртүрлі елдерінде әртүрлі аталады. Мысалы Франция, Англия, Америкада – аңғалдар күні, Испанияда – алдампаздар, Үндістанда – тоқылдақ, Жапонияда – қуыршақтар, Шотландияда тепкі күні деп аталады. (Өйткені, шотландтар бұл күні таныстарының арқасына «мені теп» деген жазу іледі де, оны сырттай күлкіге айналдырады).

✅ Ия, атаулары әртүрлі болғанымен, Күлкі күні барша әзіл сүйер жандарға ортақ болып саналған соң, адамдар бір-бірімен қалжыңдасып, көңіл көтеріп, күлкіге қарық болады. Осыған орай, біздің университетте «Өнерлі болу – ол да байлық» деген ұранымен басталған іс-шараға факультеттерден 9 команда қатысып, өздерінің шығармашылық қабілеттерін көрсетті.

✅ «Агробиология» факультеті – «AGRO PRO MAX» және «БАЛ» құрамаларын; аралас команда – «БАУЫРСАҚ БАНДА» құрамасын; «Ветеринария және Зооинженерия» факультеті – «FAVOURITE»; «Орман шаруашылығы және жер ресурстары» факультеті – «QYZYQ» және «ҰЛЫ ЛЕСФАК БАЛАЛАРЫ»; «Albeni’s» әдеби-шығармашылық клубы – «АЛЬ-МЕДИУМ» құрамасын; «Инженерлік-технологиялар» факультеті - «NUMBER ONE»; «Бизнес және құқық» Жоғары мектебі - «ИП ДИНАРА» жайдарманшыларын ортаға шығарып, өнерлерін ұсынды.

✅ Халқымыз қашанда «Күлкі ашылған гүл, көңіл шашылған нұр» деп әспеттейтін әзіл-қалжың өнерін бағалауға Қазақстан КВН Одағы, Алматы қаласы филиалының жетекшісі Оңдасын Құлымбетов арнайы келді. Сондай-ақ, Қазылар алқасында «UAQYT» Қоғамдық қорының төрағасы Бауыржан Маханбет, актер, сценарист Ардақ Кенже, актер, сценарист Зейілбек Алиев және Университеттің Әлеуметтік-құқықтық жұмыс жөніндегі жетекші маманы Мақсат Иманбеков қатысты.

✅ Көрермендерді шуақты көңіл-күйге бөлеген және шымыр әзілдерімен елді шымшылаған жайдарманшылар арасында «Бизнес және құқық» жоғары мектебі - «ИП ДИНАРА» командасы жүлделі 1-ші орынға ие болды!

✅ Жүлделі 2-ші орыннан «Агробиология» факультетінің «БАЛ» құрамасы, ал 3-ші орыннан аралас құрама – «БАУЫРСАҚ БАНДА» командасы көрінді.

✅ Жеңімпаздарға университет Басқарма Төрағасы-Ректоры Ақылбек Күрішбаевтың атынан арнайы Сертификаттар мен қаржылай сияпаттар тапсырылды.

✅ Жүлделеріңіз құтты болсын және өнерлеріңіз әрқашан өрге өрлей берсін, жас таланттар!

KazNARU Баспасөз қызметі

---------Chatbot---------
виртуальный помощник