ҚазҰАЗУ мен Вайенштефан-Триздорф қолданбалы ғылымдар университеті (HSWT) арасындағы ынтымақтастық мәселелері талқыланды
2023 жылдың 21 сәуірінде Қазақ ұлттық аграрлық зерттеу университетінің Басқарма Төрағасы-Ректор, ҚР ҰҒА академигі Ақылбек Күрішбаев Бавариядағы Вайенштефан-Триздорф қолданбалы ғылымдар университетінің Халықаралық біліктілікті арттыру бөлімінің басшысы Арам Аристакесянмен кездесті. Ол сонымен қатар, халықаралық магистрлік бағдарламаларды үйлестіруші болып табылады.
«Халықаралық ынтымақтастықты дамыту ҚазҰАЗУ қызметінің басым бағыттарының бірі болғандықтан, біз HSWT университетімен байланысымызды нығайтуға, әрі ауыл шаруашылығы, қоршаған ортаны қорғау, орман шаруашылығы, бау-бақша және азық-түлік технологиясы, биоинженерия саласындағы магистранттарды оқыту бойынша ынтымақтастыққа мүдделіміз», - деп атап өтті университет басшысы Ақылбек Қажығұлұлы.
Өз кезегінде Арам Аристакесян Бавария университетінің қызметі туралы егжей-тегжейлі баяндап, агроөнеркәсіп үшін бәсекеге қабілетті кадрлар даярлау мен ғылыми әзірлемелерді бірлесіп әзірлеуге мүмкіндік беретін бірқатар ұсыныстарын жеткізді.
Кездесу қорытындысы бойынша тараптар студенттер алмасу бойынша одан әрі жемісті ынтымақтастық туралы уағдаласты.
1. Қос диплом алу мүмкіндігімен (неміс, ағылшын тілдерінде) аграрлық менеджмент (IMA) бірлескен халықаралық магистрлік бағдарламасын жасау.
2. Триздорфтағы ауылшаруашылық білім орталығында фермерлердің тәжірибелік біліктілігін арттыру және тағылымдамадан өтуге қолдау көрсету.
3. Мал шаруашылығы және өсімдік шаруашылығы саласында Экстеншн бағдарламасы бойынша фермерлер үшін ҚазҰАЗУ базасында ауыл шаруашылығы білім тарату орталығын құру. Орталық заманауи ғылыми бағдарламалар мен жаңа технологияларды енгізу арқылы ауыл шаруашылығын дамытуға ықпал етеді деп күтілуде.
ҚазҰАЗУ Баспасөз қызметі.
