ҚазҰАЗУ СТУДЕНТТЕРІНЕ ӘСКЕРИ-ПАТРИОТТЫҚ ТӘРБИЕ БЕРУ – БАСТЫ НАЗАРДА
Студент жастарға әскери-патриоттық тәрбие беру ісі – Қазақстан тәуелсіздігі мен қауіпсіздігін, ел іргесінің беріктігін қорғайтын патриот тұлғаның қалыптасуындағы ең маңызды буын болып табылады.
Еліміздің іргелі, әрі жетекші жоғары оқу орны Қазақ ұлттық аграрлық зерттеу университетінде жастарға әскери-патриоттық тәрбие беру ісі жоғары дәрежеде жүргізіледі. Құрылғанына биыл 77 жыл толып отырған Әскери кафедра осы уақытқа дейін 60 мыңнан астам запастағы сержанттар мен офицерлерді дайындап шығарған.
✅ ҚазҰАЗУ Басқарма Төрағасы – Ректоры Ақылбек Күрішбаевтың қатысуымен осы Әскери кафедраның бір жылдық курсын бітірушілердің салтанатты Ант тапсыру рәсімі болып өтті. Салтанатты іс-шараға университет басшылары, кафедра қызметкерлері, бітіруші курсанттар мен ата-аналар қатысты.
«Қанша жыл өтсе де әскери ант қабылдаған уақыт сарбаздың есінде мәңгілік сақталады. Қарулы Күштер қатарына кіре отырып, әрбір студент ант қабылдау арқылы Қазақстан халқына, оның заңды түрде сайланған Президентіне адал болуға, тәуелсіз еліміздің Конституциясы мен заңдарын қастерлеп сақтауға, ел қорғауға міндетті. Батыр бабамыз Бауыржан Момышұлы «Отан үшін – отқа түс, күймейсің!» деп бекер айтпаған. Сондықтан да, біздің арыстандай айбатты, жолбарыстай қайратты жас ұландарымыз қашан да Отан қорғауға дайын екеніне сенеміз! Солардың қатарына қосылған сіздерді шын жүректен құттықтаймын!» - деді университет басшысы Ақылбек Қажығұлұлы.
✅ Әскери кафедра меңгерушісі, отставкадағы полковник Бастемір Дүйсембаевтың айтуы бойынша, Әскери кафедраның иелегінде 2 оқу корпусы, курсанттарға арналған 20 арнайы жабдықталған аудитория мен көптеген әскери көліктер, бронетанктік және азық-түлік қызметінің АУЫР техникалары, басқа да заманауи жауынгерлік оқу қарулары бар.
Студент курсанттар 9 әскери мамандық бойынша даярланады. Атап айтқанда: «Қарулы Күштердің жауынгерлік іс-қимылдарын инженерлік қамтамасыз етуді ұйымдастыру»; «Азық-түлік қамтамасыз етуді ұйымдастыру»; «Тамақ өнімдерінің технологиясы және тауартану»; «Ветеринариялық қамтамасыз етуді ұйымдастыру» т.б. салалар бойынша мамандықтарға баулиды.
✅ «Биылғы оқу жылында 133 студент бір жылдық оқуын сәтті бітіріп запастағы сержант, ал екі жылдық бағдарламамен оқыған 184 студент запастағы офицер атанып отыр. Әскери бастауыш білім алушылардың қатары жыл сайын өсіп келеді. Алайда, курсанттар қатарына қабылдану жастарға оңайға соқпайды. Олар денешынықтыру пәнінен және логикалық тестерден сынақтар тапсырып, медициналық қатаң тексеруден өтеді. Биыл 2023-2024 жылғы оқу жылында осы сынақтарды ойдағыдай тапсырған 814 студент әскери кафедраға оқуға қабылданды», - дейді полковник Бастемір Дүйсембаев.
✅ Әскери машықты шебер меңгерген студент жастарымызды салтанатты Ант қабылдау рәсімімен құттықтаймыз!
Ақ жол сіздерге, жас ұландар!
ҚазҰАЗУ Баспасөз қызметі.
