KazNARU ТҮЛЕГІ ҰЛЫБРИТАНИЯ АУЫЛШАРУАШЫЛЫҒЫ УНИВЕРСИТЕТІНІҢ МАГИСТРІ АТАНДЫ

KazNARU-дың «6B 07207 Азық-түлік өнімдерінің технологиясы» білім беру бағдарламасының түлегі Әлия Ержомарт Royal Agricultural University және Ұлыбритания Ауыл шаруашылығы министрлігімен әріптестік ынтымақтастықта оқытатын Халықаралық ауылшаруашылығы университетінде (Ташкент қ.) білім алып, Ұлыбритания ауылшаруашылығы университетінің «Тұрақты ауыл шаруашылығы және азық-түлік қауіпсіздігі» мамандығы бойынша магистр дәрежесін алды!

Корольдік ауылшаруашылығы университеті (Royal Agricultural University) – Ұлыбританиядағы тарихы 1845 жылдан бастау алатын аграрлық саладағы ең байырғы және Уэльс ханзадасының Корольдік демеушілігіндегі жоғары оқу орны болып табылады.

Орта Азиядағы тұңғыш магистр түлектеріне диплом тапсыру рәсіміне Royal Agricultural University-дің қазынашысы Саймон Коста арнайы келді. Сонымен қатар, салтанатты рәсімге Өзбекстандағы Британдық кеңестің директоры Дениз Уоддингем, Халықаралық ауылшаруашылығы университетінің ректоры Мунира Аминова және тағы басқа құрметті қонақтар қатысты.

«Оқу тек ағылшын тілінде болды. Түрлі шетелдік профессорлардан білім алдық. Әрине, аграрлық пәндерді, терминдерді өзге тілде оқу оңай болмады. Дегенмен KazNARU-да ағылшын тобында білім алуым, халықаралық IELTS сертификатымның болуы маған өз көмегін тигізді. Осы ретте, ең алдымен, маған сапалы білім берген университетіме, қолдау көрсеткен Ректорымыз Күрішбаев Ақылбек Қажығұлұлына, Халықаралық офиске, «Тағам өнімдерінің технологиясы және қауіпсіздігі» кафедрасының профессор-оқытушылар құрамына, кафедра меңгерушісі Мамаева Лаура Асылбекқызына және магистрлік жұмыс жазу кезіндегі ғылыми кеңесшім, профессор Керимова Үкіләй Керімқызына ризашылығымды білдіремін. Ал қазіргі студенттерге айтарым, көп тіл үйреніңіздер, оқыңыздар, ізденіңіздер! KazNARU сіздер үшін барлық мүмкіндіктерге жол ашады!» - дейді Әлия Ержомарт.

Әлемдегі жетекші аграрлық оқу орындарының бірі Royal Agricultural University магистрлік дәрежесін алуымен құтықтай отырып, Әлияға білім-ғылым жолындағы ізденістеріне табыс тілейміз!

KazNARU Баспасөз қызметі