KazNARU СТУДЕНТТЕРІ ҚАЗЫНАЛЫ ҚАРИЯЛАРҒА АЛҒЫС БІЛДІРДІ

1 наурыз – Алғыс айту күніне орай, Қазақ ұлттық аграрлық зерттеу университетінің белсенді студенттері Алматы қаласындағы “Аманат” қарттар үйіне арнайы барып, сый-сияпаттарын ұсынып құттықтап қайтты.

«Инженерлік технологиялар» факультеті ұйымдастырған бұл игі шараның басты мақсаты – аға буын өкілдеріне ерекше көңіл бөліп, олардың өміріне жылулық пен мейірім сыйлау.

Студенттер қариялармен жылы қауышып, өздері дайындағын концерттік бағдарламасын ұсынып, бірнеше тілде өлеңдер оқып, әннен шашу шашты. Өзара емен-жарқын әңгімелескен аға буын өкілдері жастарға өздерінің өмір жолдарынан қызықты естеліктер айтып, көтеріңкі көңіл күймен мерекені бірге тойлады.

Ұйымдастырушылардың айтуынша, мұндай мазмұнды кездесулер үлкендер үшін ғана емес, жастар үшін де маңызды, өйткені олар алдыңғы толқын ағалардың өнегелі істерінен үлгі алып, рухани құндылықтарды бойларына сіңіре алады.

Мейірімділік пен сыйластықтың шынайы жүздесуін өткізген студенттердің ықыласына қарттар үйінің тұрғындары алғыстарын білдіріп, ақ баталарын берді.

KazNARU Баспасөз қызметі