KazNARU мен ҚЫЗЫЛОРДА АГРАРЛЫҚ-ТЕХНИКАЛЫҚ ЖОҒАРЫ КОЛЛЕДЖІНІҢ ӨКІЛДЕРІ КЕЗДЕСТІ

2025 жылғы 06 наурызда KazNARU өкілдері мен И.Әбдікәрімов атындағы Қызылорда аграрлық-техникалық жоғары колледжінің бітіруші түлектерімен Су Хабының ситуациялық орталығында

кәсіби бағдар беру бағытында офлайн және онлайн форматында кездесу болып өтті.

Аса маңызды іс-шараға KazNARU Академиялық мәселелер жөніндегі департаментінің директоры, в.ғ.к., қауымдастырылған профессор Алпысбаева Гүлмира Егізбайқызы, Қабылдау комиссиясының директоры, профессор Қайырбаева Айнұр Елтайқызы, факультет декандары, И.Әбдікәрімов атындағы Қызылорда аграрлық-техникалық жоғары колледжі директорының орынбасары Ермұхан Бауыржан Бақытжанұлы және оқытушылар құрамы мен студенттер қатысты.

95 жылдық тарихы бар И.Әбдікәрімов атындағы Қызылорда аграрлық-техникалық жоғары колледжі 1930 жылы құрылған. Бүгінде колледжде 34 мамандық бойынша 1600-ден астам шәкірт білім алуда. Оның 1450-і мемлекеттік грант негізінде оқиды. Болашақ мамандар ауыл шаруашылығын механикаландыру; сүт және сүт өнімдерін өндіру; гидротехникалық мелиорация; агрономия; ветеринария; зоотехния; орман шаруашылығы; электромеханикалық жабдықтарға техникалық қызмет көрсету, жөндеу және пайдалану сияқты мамандықтар иегері болып шығады.

«Колледж энергетика мамандықтары бойынша АҚШ-тың Флорида штатындағы NCCER агенттігі арқылы халықаралық салалық аккредиттеуден өткен. Өткен жылы 300-ден аса түлек бітіріп, диплом алды. Биыл да сол деңгейде 298 түлек бітірмек. Қазіргі уақытта IT саласын, яғни жасанды интеллект қызметін ауыл шаруашылығында кеңінен қолдана бастағандықтан, біз де бұған назар аударудамыз. Және түлектеріміздің өз салалары бойынша жоғары білім алуына бағыт беріп отырамыз», - дейді директордың орынбасары Бауыржан Бақытжанұлы.

Еске сала кетейік, 2024 жылдың қараша айында KazNARU мен Колледж басшылығы арасында ынтымақтастық туралы Меморандумға қол қойылған еді. Осы құжат аясында Университеттің білім беру бағдарламаларына сәйкес келетін мамандықтар бойынша оқу бағдарламалары мен оқу жұмыс жоспарларын үйлестіру арқылы, студенттер үшін оқу мерзімін қысқартып оқыту қарастырылған болатын. Кездесу барысында Колледж бітіруші 7 түлек ветеринария мамандығы бойынша біздің университетке грантқа тапсыруға ниет білдірді.

Бұл жолғы іс-шараның тағы бір ерекшелігі – KazNARU мен Колледж ұйымдастырған кездесуге онлайн форматта Жәңгір хан атындағы Батыс Қазақстан аграрлық техникалық университетінің өкілдері де қатысты.

KazNARU баспасөз қызметі