«Тағам өнімдерінің технологиясы және қауіпсіздігі» кафедрасының студенттерінің жұмыс берушімен кездесуі
2023 жылдың сәуір айының 3-ші жұлдызында «Практика және жұмыспен қамту кеңсесі» және «Тағам өнімдерінің технологиясы және қауіпсіздігі» кафедрасының ұйымдастыруымен «Қайта өңдеу өндірістерінің технологиясы» білім беру бағдарламасы бойынша оқитын студенттердің «Дарқан Дала» макарон жасау цехының жетекшісі, кәсіпкер Жұмабеков Ернар Ильясұлымен өте қызықты кездесу болып өтті.
Кездесуге факультет деканы Еренова Бибіпатыма Ертаевна, «Практика және жұмыспен қамту кеңсесінің» бастығы Есимова Бақыткүл Даулетбековна және кафедра меңгерушісі Мамаева Лаура Асильбековна қатысты. Кездесудің басында модератор рөлін атқарған кафедраның профессоры Оспанов Әбдіманап Әбубәкірұлы «Дарқан Дала» мекемесімен университет арасындағы келісім-шарттың бұрыннан бар екендігін, сонымен қатар бұл мекеменің университет ғалымдарының ғылыми-зерттеу нәтижелерін өндіріс жағдайында апробациядан өткізуге де оң ықпал етіп жүргендігін тілге тиек етіп, қонағымыз Ернар Ильясұлына макарон өндірісінің қыр-сырын, негізгі процестері мен кезеңдерін айтып беру үшін сөз сөйлеуді өтінді. Қонағымыздың сөзін студенттер өте мұқият қызығушылық танытып тыңдады. Баяндама аяқталған соң сұрақтар қойылып, нақты жауаптар алынды. Ернар Ильясұлы баяндамасының жалғасы ретінде профессор Әбдіманап Әбубәкірұлы университетіміздің «Тағам және қайта өңдеу өндірістері» Халықаралық зерттеу орталығында жасалынған көп дәнді шикізаттан алынған макарон өнімдері және олардың келешегі туралы қысқаша мәлімет берді. Жарыссөзге араласқан Бибіпатыма Ертаевна, Бақыткүл Даулетбековна және Лаура Асильбековна өздерінің «Дарқан Дала» мекемесіне табыстар мен береке, оның жетекшісі Ернар Ильясұлына сау-саламаттық тіледі. Сөз соңында Әбдіманап Әбубәкірұлы айтылған тілектерге қосыла отырып, Ернар Ильясұлына университетімізде жас мамандар дайындауға қосқан үлесі және ғылыми жұмыс нәтижелерін өндіріске енгізуге ықпал еткені үшін университет Ректоры, ҚР ҰҒА академигі Күрішбаев Ақылбек Қажығұлұлының қолы қойылған Құрмет грамотасы мен Алғыс хатын табыс етті.
